Yewweḍ-d lawan n tuɣalin ɣer lakul ! Iselmaden n uɣerbaz alemmas n Ssuq Lḥed i d-yellan deg tɣiwant n Timizar deg dayra n Wagnun, yettban watwar ɣef udmawen-nsen. Aseggas yettban-asen ɣezzif.
Anebdu yezri, maca asteεfu ur d yelli ara. Akken ad yili usteεfu, laqen yedrimen. Lameεna tanmehla n usegmi n Tizi-Wezzu, ur tbudd ara anecta i yiselmaden n lwilya-agi, xas akken d nutini i d-yewwin agmuḍ ifazen deg ukayadn Lbak-nni iεeddan ! Ar tura mazal ur tekcim-ara la prime de rendement i ttalsasen. Limer d lebɣi ad yili ṭṭfen-tt di taggara n wagur n yunyu. Wamag lxelsa n waggur n yulyu akked ɣuct, alarmi i ttectaqen i d-tewweḍ ɣer yifassen-nsen !
« Acu i d sebba n waya ? ayen kan da deg lwilya n Tizi-Wezzu i ttwaḥermen yiselmaden deg wussan n usteεfu i yuklalen ? Amek ara d-nerr nnefs akken ad nqabel aseggas amaynut i aɣ-yeggunin ? », d tuttirwin i itezzin deg yimawen n yiselmaden tasebḥit-agi n wass n lexmis, mlalen deg uɣerbaz akken ad nejmaεen nutni d unemhal-nsen akken ad as-id-afen ixef-is i leqdic i ten-yettraǧun. Meɛna, ɣas tafekka-nsen tella din, ul-nsen d wallaɣ-nsen werǧin llan deg rreḥba.
Aseggas-a, ilaq tinelmadin ad rsen tibluzin tiwerdiyin ma d arrac d tibluzin tiniyin. Zeɛma, akken ad sεedlen gar wid yesεan d wid ur nesεi ! D wa i d azref deg tmurt-nneɣ ! Am win i s-yennan : “err rreks ɣer ddaw tgertilt, ad yettbaen wagens zeddig”. Ur neẓri ma tewwi-d ad nru neɣ ad neḍs ! Werǧin neffeɣ-d deg ubaxix n tikellax akked d tikerkas. Imawlan n yinelmaden rwan tazzla deg unadi ɣef tebluzin-agi timaynutin, acku xussen deg leswaq. Lḥir yezga yettenced lḥir. Mačči d yiwet ad as-ḥebbren : yemsawa umesruf n remḍan, akked d win n tuɣalin ɣer lakul rnu win n lεid i d-yettqerriben.
Inelmaden, nutni mazal ur uɣalen ara. Aya ad yili ass n lḥed. Meεna imir kkan diɣ ad yili uqram n tuɣalin-agi acku lεid ad tezg deg ttnasfa n ddurt. Akka i d tamacint tuzligt : mi tebɣa ad tafeg, kra ad tt-id-yerr ɣer lqaεa.
Anwa ara s-id-yafen ixef-is ?
Ait Slimane Hamid