Isem n yilemẓi-ya isaɣ ɣer wid i t-yessnen ama di tesdawit n Bgayet ideg yeɣra ama di taddart-is i d-yezgan di Guendouza (Aqbu). Hacim d yiwen n yilemẓi yesεan 27 yiseggasen di leεmer-is. Akken d aqrur i t-yekcem waṭṭan n ukraf meεna lebɣi-s d tallelt n yimdukal-is ad setɣelben ɣef lhemm-a amcum. Asmi yella yakan di tesnawit i yebda tira n tmedyazt. Tamedyazt-is txulef ɣef tiyaḍ imi tettruẓ tilisa i yes-sent d-ẓerben tidmi-nneɣ wallaɣen thuba tmusni. Ayen i ttkukrun ad inin wiyaḍ netta yeqqar-it-id mebla tugdi. Aya yewwi-yas-d leḥmala n yilmeẓyen ara s-igen afud ad yekk nnig n lehlak i t-yentaben. S wakka ad yekcem ɣer tesdawit ideg ara d-yeffeɣ s ugerdas n lisuns di taɣult n uẓref. Din di tesdawit yufa tagnit n tlelli ara t-yeǧǧen ad yaru tuget n yisefra-s. Hacim ɣas ma aṭṭan icekkel-as ifassen-is, atan yettaru ungal ulama s yiwen uḍad kan i s-yezmer ad yesselḥu aklabyi n uselkim. Mi t-nemlal nfures yid-s tiɣimit akken ad as-nefk isteqsiyen ɣef wayen akk ixeddem, netta s lferḥ i yaɣ-d-imuger.
Γef wacu i tessefrayeḍ akk a Hacim ?
Aṭas n leḥwayeǧ iyi-iceɣben : leḥmala, tilelli, tamurt d tmetti s umata.
Qqren-d tessexsareḍ mliḥ lehdur di tmedyazt-ik ?
D tidet meεna di kra kan. Xeddmeɣ akken bac ad nḍes, nettqessir… Nettεic tilelli-nneɣ.
Tzemreḍ ad ten-id-tiniḍ i yimdanen-nniḍen bḥal imdukal-ik ?
Ma qeblen ih ! Meεna ugadeɣ ur beqqun ara.
Ihi tettḥessiseḍ i Lbacir Bu Claɣem wecε…?
Sliɣ-as i tinna kan umi isemma « Limam-nneɣ ». Teεǧeb-iyi aṭas.
Amek armi i tesneḍ ad taruḍ akken ilaq s tmaziɣt ?
Γriɣ-tt di tesnawit, yerna imi nekk d ameεḍur ttakeɣ tuget n lewqat-iw i tira. Ys-s kan i tettuɣ ayen iyi-yuɣen, ttḥussuɣ s tlelli i werǧin ufiɣ anda-nniḍen.
Nesla tettaruḍ daɣen ungal. Tzemreḍ ad aɣ-d-temmeslayeḍ fell-as ?
Mazal εad ur t-kfiɣ ara. Atan ttεawanen-iyi deg-s yimdukal-iw. Meḥsub heddreɣ-d deg-s ɣef tayri, uguren n tmetti i yettidir yal ilemẓi n tmurt n Lezzayer. Regmeɣ-d deg-s wi i tt-ileεben akka ssnen abrid n Rebbi, bɣan ad ḥettmen tiktiwin-nsen ɣef yimdanen.
Ur txemmeḍ ara ad t-id-tessufɣeḍ ?
Di teswiεt-a, ttaruɣ kan i nekki. Ma d asiẓreg ttmenniɣ ɣer zdat ad ten-id-ssufɣeɣ netta yakk d wamud-iw n tmedyazt.
Anwa amedyaz i k-iḥuzan ?
S waṭas d Si Muḥend u Mḥend, daɣen Meɛtub Lwennas.
Nebɣa ad nekfu ameslay yid-k s kra seg wayen tettawiḍ.
Yirbeḥ ! Attan ihi di lxaṭer-nwen :
Ḥudden-aɣ-d tamusni
Nnan-d d leqran i d kulci
Kksen-aɣ lemḥibba d tayri
Nnan-d iḥerrem-itt Rebbi
Tebεet abrid n nnabi
Aṭas deg-s d tamusni
Win yelsan aqendur d ucaci
D lǧennet ara t-id-isaḥen
Cwiṭ n leεqel ay atmaten !../…
Yesteqsat Mokrane Chikhi