Tufrar-d, ussan-a deg Fransa, taluft n les moines n Tibhirine s yinnan n Général n ssrabes uffiren n Fransa DGSE, François Buchwalter. Iḍeffer-it-id amezwaru n lḥukuma taqdimt Jean Pierre Raffarin. Γer taggara innan n uselway n Fransa Nicolas sarkozy ɣef lekdeb d tidet gar tmura timeqqranin. Amzun akken yella kra i d-ttheyyin deg wussan ideg ters cwiṭ rreḥma gar lḥukuma-nneɣ d tin n Fransa. Meɛna iwacu tasusmi n Lezzayer deg lawan am wa. Ayɣer ara d-yefruri uḥbub-nni n “qui tue qui ?” imi tezmer tmurt n Lezzayer ad t-teqleɛ seg uẓar. Tasusmi n ddula ara yeldin tiwwura i uɣanen d tuzzya n wawal ɣef tedyant-a, d tin ara d-yerren ɣer unnar anwa i yettnuɣun ɣas ma win d-yessawlen “ɛalayha naḥya ɛalayha nammut”, i usbded n ddula tineslemt s sslaḥ iban. Yerna d acu yesɛa azal n yinnan n Général Buchwalter ? D yiwen n ugradi deg lɛesker n Lezzayer, yeḥka-yas-d gma-s, yewwi-yas-tt-id imir deg useggas 1996 i Général ! Dɣa, yeqqim almi d ass-a, 13 n yiseggasen mbeɛd, yenna-tt i ccreɛ n Fransa. Iwacu almi d ussan-a ? Ahat, akka kan ara d-ḥreklen yimselmen imṭerfen yellan deg Genève, Paris, Berlin, Madrid d Londres. Ad d-ččaren kra seg tcuffiḍin-nsen d nnefs, ad tent-sexsin ɣef yizzayriyen. Ahaqel kan ad d-uɣalent tedyani-nni “attentats de Paris”, “le détournement de l’avion d’Air France” “les massacres”… Tbut ulac ɣef wayen d-yeqqar Général n la DGSE. Meɛna tban-d tidet, tufrar ɣef yiwet n taluft iɣef tumen Ddula n Fransa akked ssrabes-ines uffiren. Yenneqḍaɛ cekk tura, Fransa tumen s tmuɣli-nni taqdimt-tajdidt n “qui tue qui ?”.
D. I.