Tamettut yettwahebsen

Axxam n ccreɛ n temdint n Bgayet yesɛedda yiwet tedyant yeɛnan yiwet n teqcict i d-irewlen i yimawlan-is. Lasel-is n Qsentina. D taqcict d tilemẓit, fell-as 16 d aseggas. Terkeb-d lkar armi d temdint n Bgayet ters-d. Deg udelweḥ i tdelweḥ deg yiberdan n temdint, walan-tt-id sin n yilemẓiyen, ggunṣen-tt-id, ṭṭɣaren ɣur-s, temla-yasen-d acu tt-yuɣen. Meslayen yid-s, cebbḥen-as-d liḥala, ssamnen-tt ; tedda yid-sen.

Yiwen deg sin warrac-a, yejba s axxam, yuker-d tisura n yiwen n uhungar yekseb baba-s deg temḍiqt yellan tqubel lebḥer. Kerfen din tilemẓit-a. Tilemẓit-a, la aḥnin la wali, tuɣal am lmal bla timenzeɣt ; anda i tt-izuɣer yiwen ad teddu. Ur teẓri ma ɣef leslaḥ-is neɣ ɣef lexsara-s.

Arrac-a, ufan abrid. Qnen-tt sḥebsen-tt deg uhangar. Ulac win i d-yewwin lexbar. Mi zrin tlata n yiseggasen ɣer wagguren-a, taqcict terwel-d seg wanda tettwaḥbes. Abrid yettak-itt i waye&#7693,; seg tezniqt ɣer taye&#7693,; armi d-tewweḍ ɣef yimbiddi n lkiran, temlal-d yiwen n urgaz, teddukel yid-s.

Ibulisen yettmendiden, mi walan lxilaf n leɛmer gar-as d urgaz-a, cukkten timlilit-a ur tesfi, sḥebsen-ten. Steqsan-ten ufan ulac kra n lɛalaqa yesfan gar-asen. Sawlen i ufurgu yegla yes-sen ɣer uxxam n lkumisar. Mi bdan lbeḥt, ẓran taqcict n Qsentina, sawlen ɣer din, wwin-d lexbar belli mačči d tikelt tamezwarut i terwel seg uxxam n yimawlan-is. Γer usteqsi anda tettili, taqcict tenna : “Segmi d-usiɣ seg Qsentina, nekk d urgaz-a i ttiliɣ.”

Argaz-a, lasel-is n Iɣzer Ameqqran, yenker ayen sway i t-tethem teqcict-a, yerna yefka-yasen-d lbayan belli d tikelt tamezwarut i tt-yemlal. Ibulisen ḥettmen ɣef teqcict armi d-tesqer ayen akk yellan. Anda i tella tettwaḥbes, d anwi i tt-iḥebsen din. Ibulisen sawlen i bab n uhangar.

Taluft tura attan tettkemmil deg uxxam n ccreɛ n Bgayet.

Ait Ighil Mohand