Imḍebbren n tɣiwant n Iɛekkuren akked yiɣallen n lemḥadra n tẓegwa xeddmen yiwen n wahil ɣef lemḥadra n tẓegwa deg-s ad sduqqsen imdanen. Γef waya xeddmen tifelwiyin deg yiberdan akk deg yimukan n lbaylik. Imdanen teɛna temsalt d wid yittidiren ladɣa deg tuddar, acku mi ara yekcem unebdu ttfrasen igran-nsen yerna jemmɛen-d lɣella-nsen am : lqerḍ d yirden… Rnu ɣer waya mi ara ceɛlen times ilaq ad tɛassen iwakken ur d-tgelluy ara s lexsara.
Tiẓgi tesɛa azal meqqren di tmeddurt n yal amdan, acku mačči kan d isekla imi ttidiren deg-s yimɣan-nniḍen d yiɣersiwen. Aseklu yettak-d abeḥri i turin, yerna yessenqas azɣal deg unebdu. Γef waya yewwi-d ɣef umdan ad tt-iḥader axaṭer d agama i iḥuder.
Oussaidane Lamia