Ilmend n usmekti n wass n tlelli n tmurt n Lezzayer, tidukla n tudrin n At Bimun-Ǧewwa, theyya ahil d amerkanti, s teɣzi n 10 wussan.
Tugett n wayen i d-heyyan d leqdic, yiɛeggalen n tiddukla Ǧewwa, yella-d, iletha d yilemẓiyen, rnan fkan azal meqqer i waddal. Leqdic ixulef ɣef yiseggasen yezrin. Akka dɣa imezdaɣ n tudrin yezgan gar yidurar n At Bimun, rẓan asalu.
Deg wahil-a ulac tameskant ɣef lgirra. Mi nesteqsa Ḥmed Brahmi, yiwen deg yiɛeggalen n tdukla, yerra-yaɣ-d s wawal : “nra ad d-nmeslay i tsutiwin yefkan tirwiḥin-nsen ɣef tlelli n tmurt, ad asen-nini tara ẓẓan, tin sarmen anda ad walin tarwa-nsen tefreḥ,; attan tuɣ,; ula d azwel nextar d win i d-yemmalen lehna : Amennuɣ ala !”
S yisem “Amennuɣ ala”, tidukla n Ǧewwa tesbedd-d ahil d amerkanti. D win ideg ufan iman-nnsen akk wid i d-yettwanecden. Aṭas i d-yerran i tiɣri : si tal tamnaṭ n twilayt Bgayet jban-d (Aqbu, Sidi Ɛic, Sedduq…). Tlatin n trebbaɛ i itekkan. Ma d addalen xelḍen yella tiqqar (karaté), ddabex-uḍar, turart n tkennurin (jeu de boules), …
Taqbuct n turart n tkennurin, anda tekkant 30 n trebbuyaɛ,; tuɣal-d i Sedduq ; taqbuct n waddal uḍar, uɣur tekkant 10 trebbuyaɛ,; tuɣal-d i taddart Mazekwan. Ahil yekfa s tmeskant warrac n Sebbaḥi Lɛaziz.
Nnig n lferḥ-a d usmekti, netter Ḥmed Brahmi, ɣef yiswiyen nniḍen. Yenna-d : « Nra a d-nesddukel imezdaɣ n tudrin-nneɣ. Mmi-s n uzaɣar ad yissin mmi-s n udrar. Ad walin leqdic ibeddu s liman ; nbeyyen-d s wulac nezmer ad neg aṭas lecɣal. Nessaram ad teqqim d lɛadda, akken Abimuni ad yissin Aweɣlis, Aɛidel ad yissin Aɛebbasi, … »
Ait Ighil Mohand