Labaεda asyax meqren i yewten deg seggas 2001 di taddert n At-salaḥ taγiwant n Wizgan, u yegla-d s lemḍera meqqren imi yedhem niqal 03 n yexxamen ad-γlin. Imḍebren n tγiwant n Wizgan n tallit-nni sfaqden γer wemḍiq anda i wallan asyax-agi, syen begsen-d akken ad-εawnen 03 n twaculin-agi i yenṭaren s tikci n tmezdaγ anda niḍen. Γef aya iεeggalen n 03 n twaculin-agi ḥettmen fell-asen akken ad-ffγen deg yexxamen-nsen di taddert n At-salaḥ, anda isen-ffkan zedγen deg tesmilin (les classes) n yiwen uγarbaz iwmi medlen tiwwura acḥal iseggasen-aya, id-yezgan di tlemast n temdint n Wizgan, deg laεḍil ad-sfaydin s tmezduγin anda niḍen. Maca, deg seggas ni 2001 ar ass-a, tiwaculin-agi ttidirent tignatin yuεren aṭas sebba n lexṣaṣ yellan, rnu imḍebren n temnaḍt n Wizgan γef yiles n yiεeggalen n twaculin-agi yenṭaren, nnan-d muḥal sfaqden-d fell-asen i tifrat n wuggur-agi. Γer tagara, iεeggalen n 03 n twaculin-agi i yenṭaren sḥasfen aṭas γef yir tignatin i ttidiren yal ass, anda i suturen deg yemḍebren taεna temsalt akken ad-ggren imman-nsen s lεejlan i tifrat n wuggur-agi ideg ttexbibiḍen s teγzi n 12 iseggasen.
I.B.