Sin yiseggasen γef tegrawla n lyasmin, ha-tt-an Tunes γef yiri n lkaf. Kra n usirem i d-xelqen wid-nni yennuγen, yuγal d yir targit, ‘’ččan-asen imensi wid-nni yeṭṭurcen, tegra-asen-d tarda n leḥwal’’. Σni d abrid-nni n GIA i d-qesden yimencaf-agi : anda tuγ teftilt, ad tt-ssensen. Timenγiwt n Choukri Belaïd, yiwen urgaz asarti i imechuren deg tmurt n Tunes, tbeggen-d udem n ṣsaḥ n yiεdawen n tudert. Aṭas i as-yeqqaren, Ennahda-agi n Tunes ‘’tessifilizi !’’, ass-a ihi iban-d usigna s wayes tekkat. Win ara yenγen win yeγran, d acu ara neg s tmusni-s,i as-yenna winnat. Wissen kan Itunsiyen ma ad semḥen deg-s neγ ala. Σlaḥsab n wayen nwala ass-nni n temḍelt-is, waqila ulac smaḥ ulac imi d luluf i yewwin Choukri Belaïd γer uxxam-is aneggaru. Meεna, ula seg tama-nni n Wat yiččumar fγen-d s abrid i wakken ad d-smektin, εlaḥsab nsen, d akken Tunes ‘’dawla islamiya’’. Am wakken wagi nγan yuklal-itt imi netta yella mgal tikti-agi nsen. Netta yebγa ad yessebεed ddin γef tsertit.
Akken yebγu yili, asirem mazal-it meqqer γer Yitunsiyen imi amur ameqqran faqqen s txidas n wid yeṭṭfen adabu. Faqqen ‘’srewten εebban yiwaḍ’’.
Hocine.M