Deg timlilit n yikabaren yezzin ɣef wahil n uselway (RND, FLN, MSP), tebded yiwet n tesqamut ara d-yelhun deg uheyyi n wayen yerzan aberreḥ ɣef tefrant n uselway n yibrir 2009. D tidet, d ussan ideg tebda tettfurr teswiɛt ɣef tefrant n uselway n yibrir i d-iteddun. Maca, llan wid yettazzalen ad swejden tagnit, llan wid yettfarasen tagnit.
…Aya, yeḍra-d deg tallit ideg Bouguerra Soltani, aselway n MSP, yuɣal-d daɣen, akken yuɣ tanumi, ɣer uttaftar-nni n FIS, deg temlilit i iga uɣmis El Khabar; d Rebbi iraden, d tabarda i imalen.
Abou Djerra Soltani, iberreḥ-d s wawal-a : “ad yekkes leḥris yellan ɣef tugdut yerna ad d-yefk tagnit i FIS akken ad d-yuɣal ɣer unnar n tsertit s yiwen kan ccerṭ: ilaq kan ad beɛden ɣef ubrid i d-wwin deg umennuɣ : sslaḥ d tekriḍt (la violence)”. Aya d ayen ara yini i Mass Bouteflika, ma iɛedda d aselway i tikelt tis tlata.
Awal yettawi-d wayeḍ yerna iserreḥ-as-d i tayeḍ : “nekk ur ndimeɣ ara imi kkiɣ s yisem n ukabar n FIS deg tefranin n yulyu deg useggas 1991.” Ziɣen, yekki daɣen deg yiwet n temlilit tuffirt i yeḍran deg Wehran deg useggas 1991 anda i msefhament akk trebbaɛ i yellan deg tallit-nni s yisem n tneslemet deg unnar aserti, ad beddent ɣer tefranin s yisem n FIS.
Ayen d- Bouguerra Soltani yenna akk Bouguerra Soltani, yuɣal s yisem n tugdut, d aselway n ukabar MSP imi tefka tegduda tazzayrit ttesriḥ akken ad yeqdec deg unnar n tsertit. Aya, yenna-t-id deffir akk n wayen yeḍran deg 10 n yiseggasen-a ineggura seg lexsarat i Lezzayer. Maca lexsarat n yidrimen ur d-tesɛi azal zdat n wid akk yemmuten ɣef Lezzayer akken ad tidir d tigduda d tamagdayt. Akka, ziɣen taxessart tamezwarut ad tt-id-treggel tis snat ɣur Bouguerra Soltani, d wa i d lirad ur t-nuksan. Ay aqejdur a tasilt! Iseggasen ttuɣalen ttɛeddayen, amaynut ad yeqqel d aqdim ɣas ur t-bɣin; akka i la tberren ddunit ma d wi am mazal ur yefri ssuq ɣur-sen, mazal ur asen-yeffiɣ rruḥ mi asen-d-qqnen allen, la ttezzin ttenḍen deg wayen yefran yakan. Tilufa n medden ferrunt ma d tigi n Bouguerra Soltani d zzyada i d-rennunt.
Dj. Ikhloufi