Mazal ar ass-a, cfawat n temẓi ẓẓan deg wallaɣ-iw. D tagara n smayem n unebdu, ɣlint-d kra n tmiqwa n ugeffur, yessemḍi lexrif. Msired inurar, tessared akk inurar. Kkreɣ-d zik, ddiɣ d yemma ɣer wurti n tneqlin, ad d-nelwi. Mazal nnda ɣef yiferrawen n yimɣan. Lsiɣ tamḍelliwt, wwiɣ taqecwalt deg ufus-iw. Yemma, tesbur abeḥnuq ɣef uqerruy-is. Tbubb aqecwal ɣef uzagur-is, teṭṭef amextaf deg ufus, tesɛukkuz fell-as, deg ufus-nniḍen, teṭṭef taqecwalt. Nɛedda tamazirt qbel. Nekkes-d akermus. Sder n ukermus, iruḥ s teɣzi, yeṭṭef akk aḥdid n tmazirt. Teddem-d yemma tameḍṛact, teɣzi-ines tugar lqedd-is s uzgen. Tebda tqerrem-d tikeṛmusin yentan deg yiḥbulen. Tin i d-tekkes, ad tt-tessers di lqaɛa. Tettruḥ deg uḥbul ɣer wayeḍ. Tesrusuy-itent di lqaɛa d tiɛemmurin. Tferren-d tikeṛmusin tisewwaɣin, tettaǧǧa tiwraɣin akked tzegzawin. Terra tameḍract s amkan-is. Teddem-d kra n tseḍwa n umageraman, tebda tseffeḍ syis-sent tikeṛmusin-nni yellan di lqaɛa, akken ad ɣlint tsennanin-nsent. Mi tekfa, tettaṭaf-itent-id s tqernit n yiḍudan-is, teggar-itent ɣer tqecwalt. Ur nɛeṭṭel ara nṣubb ɣer wurti n tneqlin, iṭij mazal ur d-yesṭuṭec ara. Nelqeḍ-d axuj d tiɛemmurin, nger-it s acekkaṛ waḥd-s akken ad t-nawi i lmal ad t-yečč. Nebda alway akken kan la d-yesṭuṭec yiṭij. Yemma, tiṭ-is fell-i, tettmal-iyi-d amek i ilaq ad d-lwiɣ. Uqbel ad kseɣ tabexsist seg uqeḍmir-ines, ilaq ad tt-ṭṭfeɣ ma terḍeb neɣ teqqur. Ma terḍeb, ad tt-id-kkseɣ, ma teqqur ala, mazal-itt d tagurbizt. Mi ara d-kkseɣ tabexsist sentayeɣ accaren n yiḍudan-iw deg uqeḍmir akken ur d cellxeɣ ara taclimt-ines. Ma yella d iniɣem, tekkes-aɣ-t-id s uqeḍmir-ines. Yemma, ur tezmir ara ad tali tineqlin, tettemlelluy. Tettɣimi seddaw, tesseknay-d ifurkan s umextaf. Ma d nekk ttaliɣ ar sufella, ttnadiɣ gar ifuṛac, tekkseɣ-d tibexsisin ffren iferriwen. Deg yiferrawen i d-yettquccumen, tneggi-d lliqa ɣef yifassen-iw, tečča-yi taglimt-iw, kemzeɣ. Yemma tettmal-iyi-d akk ismawen n tneqlin, yal tikelt mi ara nruḥ ad d-nelwi. Yettban-d umgarad-nsent di tbexsisin i d-ttaǧǧant : ta d tiberkanin, ta tibelbaḍin, tiyaḍ d tibelbulin…atg. Ula d tineqlin, yal taneqlet tesɛa isem-is. Yella imelwi, tabakurt, acamlal, tabelɣenjurt, tajenjart, tamuḥbult, ajanjar… Sneɣ amawal n urti seg uqerquc alarmi d iniɣem. Mi d-neččur aqecwal, ad d-nezzi s axxam. Deg ubrid-nneɣ, ntekkes-d tizwal deg yinujjal i d-iḍeggren tiriwa ɣer ubrid, nsenni-tent deg yiguza di tɣedducin n yimɣi n ubsis. Deg uxxam, yemma, tefren ayen i d-nelwi d tiɛemmurin. Tettḥizi-d tibexsisin ara nečč ma d iniɣman, tefser-iten i yiṭij akken ad qqaren, d tazart. Taggara n lexrif d taḍuṛi n yifer, nettruḥ nesseɣlay-d ifer n tneqlin, nfetter-it iḥeṭṭem, nettak-it i lmal i tett-it.
Fahim Messaoudène