Tazwara n ddurt iɛeddan, yettwagdel usarag n umaru Zubir Zrarga, mmi-s n Xerraṭa, deg Uweqqas. Ur iban s wanwa udem i yettwasemres ugdal-a, maca iban-d dakken ur d-tessufeɣ tdayra ttesriḥ mi ara as-t-ssutren yimheggiyen n tɣellust taseklant n Uweqqas. Am wakken i yeḍra waya deg wussan yezrin mi yettwagdel temlilit akked umaru afransis Armand Vial,i yellan yettraǧu ad yessefti awal ɣef udlis-is amaynut. Rnu-as wid i yettwagedlen ayyuren-a ineggura ɣef waṭas n yimura-nniḍen. Dɣa seld tugin-a n yinesdabuyen, tessufeɣ-d Tdukkla Azday Adelsan n Uweqqas yiwen n ulɣu ideg i d-tewwet ɣef yir rray-a. Ideg i d-uran ladɣa: «… La nettmesteqsay acimi isaragen yettwagedlen deg Uweqqas ttwasurgen anda-nniḍen?». D lḥir i yettziden yettahda ɣur wid yebɣan ad seḥbibren ɣef yidles deg temnaḍt, ladɣa imi isaragen i yettwagdalen deg Uweqqas, ttwasuragen deg Bgayet, Tifrit, Wizgan d wanda-nniḍen. Am waken ara nɣer deg ulɣu aqbur diɣ: « …Syin ɣer-s, Massa taɣellat n tdayra tugi ad aɣ-d-tefk tanaga n wawwaḍ i d-yettwekkiden tarusi n ukaram i ummag n usarag, aya si tama, si tama-nniḍen, tugi ad aɣ-d-tesselɣu s ugdal n usarag». Ilaq ad d-nini ṭṭabeɛ n tɣellust taseklant n Uweqqas mi d-yuɣal s wudem ajdid yella yeɛna s waṭas imura izwawen i yettarun s tezwawt. Maca taggara-a, xemmen yimheggiyen, ad d-seddun ula d wid yettarun s tutlayin tiberraniyin.
M. K.