Yekfa uɛeṭṭel n tkeryas deg ubrid aɣelnaw uṭṭun 26 deg tama Genduzza. Yewweḍ leqdic ɣer taggara-s mbeɛd 2 yiseggasen. Tiqenṭert teldi s wudem unsib sɣur Lwali n Bgayet, Mass Ali Bedrici ass-nni n lexmis 23 deg yulyu 2009.
Tiqenṭert n Genduzza d tin i yesɛan deg tehri 12 m ma deg teɣzi 243 m. Leqdic teṭṭef-it tkebbanit n ENGOA, yettwasnen deg tmurt-nneɣ deg lebni n tqenṭyar timeqqranin d lecɣal yessawnen. S tqenṭert-a, Lḥukuma-nneɣ tessarem ad tekkes kra yimeḍqan, yettɛeṭṭilen s waṭas tikli n tkeryas, seg ubrid aɣelnaw w-26 i d-yessekcamen ɣer Bgayet ladɣa ikumya i d-iqesden asagen-ines.
Assen dɣa, yeldi Lwali tiqenṭert i yeɣlin deg furar n useggas 2007 deg tama Sidi Ɛic mi iɛedda ukamyu iwmi qqaren porte-char yettaznen 2100 iqenṭaren. Ma terniḍ ɣer tqenṭyar n Genduzza d Tin n Sidi Ɛic, tullya n tqenṭert n Sqala yettawin ɣer twilayin n ccerq tmurt am Sṭif d Jijel, abrid ahat ad iserreḥ nezzeh ɣef yibgaytiyen.
Si tama-nniḍen, yerna yeḥḍer, daɣen, Mass Bedrici beddu n lecɣal s wudem unsib i uɛiwed n wannar n Tmazɣa deg Bgayet.
D. I.