Γas akken xemsa n yiseggasen i iɛeddan ɣef lmut-is, maca imdukal-is d yimezdaɣ n taddart-is ur tettun ara. Wagi, d Moh Remaci, yiwen n yilemẓi i teccelqef lmut mi akken bdan ǧǧuǧǧugen wussan-is. D yiwen n umyurar di ddabex n uḍar ifazen di temnaḍt-agi, imi yurar di tazwara di terbaɛt n Leɛǧiba. Tiddi-ines, d tin i d-ijebden lwelha n waṭas n yislaɣmayen, d ayen i t-yeǧǧan yerra tama n Bordj Bou Arréridj, anda yurar azal n sin n yisegasen. Syin, yezzi-d iwakken ad ikemmel leqraya-s. Asgunfu-ines di taddart-is d win i t-yeǧǧan ad yerr assaɣ d waṭas n yemdanen. Yiwet n tmeddit, mi akken i d-yeffeɣ si lǧameɛ,; yenwa ad yerr tama yiwet n lqahwa anda i t-ttraǧun yimdukal-is. Urɛad yezgir abrid aɣelnaw w-5, tcelqef-it yiwet n tkerrust. Γas akken ssawḍen-t yemdanen s lɛejlan ɣer sbiṭar, tiyita yuɣ d tin ur as-neǧǧi tagnit iwakken ad yidir.
Γef waya, i d-yettwahegga yiwen n “le tournoi” i s ara rren tajmilt i uqcic-agi. Azal n 12 n trebbaɛ i yekkin deg waddal-agi ara yekfun deg ussan-a i d-iteddun.
M. Smail