Lhemm n uzɣal, rnu lhif n trisiti

« Akken yella wass, ad t-yeks umeksa » i d-nnan yilmeẓyen i d-nemlal ɣef 3 n ssbeḥ di tala. Ilmeẓyen n taddart-a ruḥen ad kksen cwiṭ n uzɣal din imi ussan-agi ineggura tzad lḥamu mačči d izli ula deg yiḍ. « Nekni meqqar nezmer ad d-nerwel ɣer da, axessar d igerdan akked yimɣaren msakit, yal iḍ d nnger ɣur-sen, ulac trisiti, ula d aman s tmeqqwa di taddart i d-yezgan daxel wasif », ikemmel Ali di lhedra.

Ugur n trisiti-a d win i d-yebdan azal n 2 yiseggasen aya deg yiwet tama taddart iwumi qqaren Lexmis. Le transformateur i asen-rran din d aqdim, yettwakkes-d si tama-nniḍen di taddart anda yennerna userɣi n trisiti, dɣa ur as-yezmir ara. Imḍebbren n Sonelgaz nnan-as ahat swaya ad tefru temsalt.

Acu kan, agguren kan, bdan ttbanen-d wuguren ; yal mi ara d-yaweḍ yi&#7693,; ad truḥ trisiti, ur as-yezmir ara le transformateur-nni i wanect-nni n teεkumt i d-nnan wid teεna temsalt. Yal mi ara truḥ trisiti, ad ssiwlen i yixeddamen n tkebbanit-a ad d-ruḥen ad tt-id-rren. Acu kan agguren-a ineggura ur tettaṭṭaf ara maḍi ; mi d-tuɣal, truḥ.

Ayen yessewhamen deg wanect-a, d tasusmi n yimezdaɣ ɣef lbaṭel am wagi ! Amek ur ḍliben ara le transformateur ajdid acḥal aya ! Armi d ssmana-a i d-yekker Tahar d terbaεt-is iwakken ad d-lhin d temsalt : « nefka-asen ssmana i tkebbanit-a ad qeεden lecɣal, ma ulac ad terwi, neẓra amek i d-ttawint tura tudrin izerfan-nsent, ad nexdem am taddart n Yisyaxen, ad neɣleq abrid yerna deg wass n ssuq » i d-yenna yiwen gar-asen.

Lhocine Ourezki