Am yal aseggas, aggur n Remḍan yettrusu-d ɣef yinselmen ladɣa di Lezzayer am bu berrak ! Kra kan n wussan uqbel ad d-yaweḍ, ad yekker wah ruḥu deg twaculin, ad tezzi tmuɣli ḥala kan ɣef wacu ara yemmeččen. Meɛna, anisi ara d-kken yidrimen i waya ?
Tanumi tezdeɣ wid yesnuzuyen deg leswaq. Ɣas kan bran-d di tiliẓri i wass amenzu n Remḍan iwakken ad nwali ssuma n wacḥal d asafar yessemɣi-d afriwen. D ayen ur izmir umdan ad t-yamen mi ara d-inin asafar-a mačči d lawan-is neɣ ahat ixuṣ, ur t-id heggan ara yifellaḥen.
Lqares, imi d win i ssexdamen s waṭas deg waggur-a, yuli si 50 ɣer 250 n yidinaren, yegla yid-s ssuma n uyaziḍ yewḍen ɣer 350 n yidinaren i kilu. Ma d isufar-nniḍen, amdan ad yedmu uqbel ad yadef tabburt n ssuq, imi lbaṭaṭa yella tettnuz s 25 tejba ɣer 40 n yidinaren, claḍa 100 n yidinaren. Lḥasun, ur yelli kra ara d-yerren asirem ma mačči d agzar n umdan ur neẓri sanda ara teffeɣ : azɣal, fad, d leɣla di leswaq. Ad iṣṣer Rebbi !
Ddeqs aya segmi i yebda di « facebook » yiwen n uberreḥ n waṭas n yimdanen i yessawalen s aɣunzu n uksum di tallit-a n Remḍan. Asirem-nsen, dakken ad rren ttar i ssuma n usafar-a yegguman ad yili d win iwumi zemren yimdanen ad t-aɣen. Aberreḥ-a, yuɣ aẓar deg wallal-a n l’Internet, almi aṭas i iḍemɛen dɣa s tidet ad ṭṭfen medden deg wawal-nsen. Ziɣ kullec d aɣebbar s allen, imi aɛebbuḍ yelluẓen d lmuḥal ad yekseb imeẓẓaɣ, akken i qqaren deg wawal.
Aya, nwala-t ass amenzu n Remḍan, imi win yenwan ad yeqḍu tameddit ur yessaweḍ ara ad yaf acu i yebɣa, imi ama d igezzaren neɣ wid yesnuzuyen aɣrum, ur d-yegri kra ɣur-sen, ad d-tiniḍ ssiksilen si ccetwa amer ad d-yezzi udfel, ad tergel tizi ! Aya, imi umnen kra dakken ur yettnuzu ara uksum di Remḍan.
Remḍan, d tagnit daɣ i twulef tselwit n tigduda tessawal i yineɣlafen, almi tuɣal d lɛada, deg-s i ssexdamen yimdanen nniḍen tasertit labeɛda imi d lawan n uheggi i tefranin n tɣiwanin d tejmaɛt n twilayt.
D aḥaseb neɣ d timesliwt kan i yineɣlafen ?
Am yal Remḍan, aselway n tigduda Abdelaziz Bouteflika yessawal-d i yineɣlafen, yiwen yiwen, iwakken ad mmeslayen neɣ ahat ad ten-iḥaseb ɣef yisenfaren yettwaxedmen neɣ ara yettwaxedmen !
Yal tikkelt, ttqiṭṭiren-d akken kra n yisallen i d-yettawin ɣef umeslay gar uselway d uneɣlaf , maca tikkelt-a wissen amek ara d-yili cɣel.
Aseggas-a iban ad yemgarad ɣef wid yezrin, imi qrib aggur uqbel tifranin n 10 maggu iɛeddan, azal n 06 n tneɣlafin i yeqqimen mebla amḍebber unṣib.
Amek ara d-yili uskasi ɣef usenfar yecban abrid ameqran Asammar-Amalu skud Amar Ghoul ur yelli ara deg tneɣlaft ? Iban daɣ mačči d Abdelmalek Sellal i izemren ad d-yefk agzul n wayen i yettwaxedmen deg Umiṭru deg ubdil n Amar Tou ? Amek ara d-yili wawal ɣef unekcum asdawan gar uselway n tigduda akked Lhachemi Djiar mebla ma yeḥḍer Harraoubia ?
Lḥasun, yettban d timlilit n lemcawra mačči n lemḥasba (ma tella dɣa s tidet !)
D ayen dɣa i iceɣben rray n yizzayriyen i iwehmen amek akka nnig n sin n wagguren segmi i ɛeddant tefranin ɣef tejmaɛit taɣelnawt mazal kra n tneɣlafin tteddunt mebla bab-nsent. Awal yezla ɣef yiles, leryuy ṭṭuqten imi yal wa yettawi-d ssebbat i izemren ad ilint d tuɣdimin ɣef leɛḍil n usbeddi n yineɣlafen deg yimukan i d-yeqqimen ar ass-a d ilmawen !
Ameslay, sumata, yettezzi kan ɣef lemxalfa i iyellan ahat gar tamiwin yettnadin anita ara yawin amur meqren n yineɣlafen. Wamma, amek ara d-yili waya imi d lawan ideg ara tessejhed tmurt srabes-is seg wakken ṭṭuqtent tlufa yerzan lixsas n waman, iberdan, tanezduɣt…Rnu ɣer waya, d anekcum aɣurbiz, asdawan d umtti ur nettɛeṭṭil ara ad d-yaweḍ.
S. M.