Gar lixsas d ureggem

Partager

Sidi Aich yiwet seg tɣiwanin timeqqranin n twilayt n Bgayet. Deg leḥsab aneggaru i tga tmurt-nneɣ deg yibrir 2008, azal n yimezdaɣ yewweḍ ɣer 14000 nnejmaɛen deg tjumma n 7km2. Ugur ameqqran i tettidir tɣiwant-a d lixas n wakal i lebni n tmezduɣin neɣ i usnulfu n luzinat.

Deg wayen yerzan tadamsa, deg lluzinat n lḥukuma yeqqim win n ssmid ERIAD azal n 120 n yixeddamen, rnu ɣur-s drus n lluzinat mačči n ddewla meɛna drus akk ya. Amur ameqqran yimezdaɣ ad tafeḍ deg Bgayet neɣ deg temnaḍin-nniḍen neɣ deg srabes tedbelt (administration) i ixeddmen. Dayen i yeǧǧan ccumaj yewweḍ ɣer lḥedd-is deg Sidi Aich imi azal 50% n yilemẓiyen ur xeddmen ara. Imḍebbren n tɣiwant qqaren d ccumaj i d taɛkemt yerna ur nezmir ad t-nekkes imi mačči deg yifassen-nneɣ i tella tifrat. Amek ur yettili usḥissef ? Qrib 8 n yiseggasen ur ifuk usewjed n temnaḍt i yettuɛeynen i lebni n lluzinat, la d-qqaren d asurḍi i ulac!

Ugur-nniḍen i ttidiren yimezdaɣ n Sidi Aich d win n tmezduɣt. Deg tazwara, azal n 120 n twaculin zedɣen deg yigerbiyen yellan deg lḥuma “les Oiviers”. Lwali n Bgayet iṛeggem imezdaɣ n yigerbiyen ad as-nebnun 145 n tmezduɣin, ar tura ur bnint ma d tiwaculin-a ttrajunt. Azal n 1330 n yitteftaren n tmezduɣin i yersen ɣer tɣiwant n Sidi Aich ma d nettat deg wahil aneggaru n twilayt ala 55 n tmezduɣin deg ssenf n LSP rnu ɣur-s 45 deg lesnaf-nniḍen i as-d-isaḥen. Aman d ugur-nniḍen imi aṭas leḥwami ar tura ttuɣalen-asen-d tikelt deg 15 n wussan, cwi kan akken d-qqaren wid terza temsalt, ugur-a ad yettwikkes imi idrimen ttunefken-d i ureqqeɛ d useggem n yiqudas n waman. Ayen yessfraḥen deg tɣiwant n Sidi Aich, d taluft n lgaz. Azal n 70% n yixxamen yesɛa lgaz, dɣa tezga gar timezwura n tɣiwanin deg twilayt n Bgayet.

Deg wayen yerzan ilemzẓiyen, tazeqqa n sinima ad as-tɛiwed akk taɣiwant imi liḥala ideg tella mačči d ayen yettamen umdan. Daɣen, ttunefken-d idrimen i ureqqeɛ n unnar ddabex uḍar n Sidi Aich, rnu ɣur-s lebni n temkarḍit (Bibliothèque) tajdidt ara yebdun ussan-a i d-iteddun.

Dj. Ikhloufi

Partager