Ass-nni n sed, 17 deg duğember 2016, ɣef 16h n tmeddit i tebda s wudem unṣib tezrigt tis 15 n tfaska tadelsant taɣelnawt n usaru amaziɣ deg uxxam n umezgun amniḍan Kateb Yacine n temdint n Tizi Uzzu.
Yella-d leqdic-agi s ddaw leεnaya n uselway n tegduda Mass Abdelaziz Bouteflika d lwali n Tizi Uzzu Mass Med Bouderbali, s lemεawna n tenmehla n yidles akked d tesqamut n tfaska-a. Leqdic-agi, ad yeddun ɣef teɣzi n 6 n wussan, imi yebda s wudem unsib ass n sebt iεeddan, ad yekfu ass n 22 deg waggur-a ideg nella. Tazrigt-agi tis 15 gan-tt d tajmilt i tnaẓurt tameqqrant “Ourida Mezaguer” yettwassnen s yisem n “Anissa”, tefka-d aṭas i ssinima d tezlit taqbaylit, am wakken daɣen tettcebiḥ isura ideg i d-urar, amedya: Axxam n Dda Meẓyan, Itij n Zira, Tawrirt yettwattun…atg. Wid i d-iheggan ttiεad-agi adelsan, fkan-as asentel : «Ssinima tamaziɣt : Tanfalit n wazalen n uktuyen iɣelnawen». Ma d ahil yettwajerden i lmend tezrigt-agi d amerkanti, imi yettili-d usenεet n wazal n 26 n yisura, 12 seg-sen ttilin-d deg uxxam n yidles Mulud At Mεemmer, ma 14 niḍen ttilin-d deg tzeqqa n ssinima n Tizi Uzzu. Am wakken daɣen i d-ttilin 8 n yisaragen i d-yewwin awal ɣ ssinima d usaru amaziɣ s umata. Ahil i d-yettilin deg uxxam n yidles n Tizi Uzzu, yettili-d akka: ass n 18/12/2016, yella-d usenεet n 4 n yisura: Ṣṣut n tsusmi, Tazemmurt, Deg uxxam-nneɣ… Am wakken diɣen i d-yella yiwen n usarag sɣur Mass Ali Mouzaoui, i d-yewwin awal ɣef tugna deg usaru amaziɣ Ma d ass-agi n letnayen, 19/12/2016, ad d-yili usenεet n sin n yisura: ‘’Awi-d ulac qqim ulac’’ akked ‘’Tiẓẓift n lqaεa’’. Am wakken diɣen ara d-ilin sin n yisaragen sɣur Chahinez Mohammadi d Addelkrim Tazaroute, ara d-yawin asentel n ssinima Tazzayrit. Ma i uzekka, 20/12/2016, ad yili usenεet n 5 n yisura: Tayri d udrim2, Imawen s yiniɣen, A Crif, Ṭiṭuc, I neẓra mazal ad nẓer. Am wakken daɣen ara d-ilin sin n yisaragen sɣur Mourad Chouihi d Ahmed Cheniki. Ma deg wass uqbel aneggaru, 21/12/2016, ad d-yili usenεet n yiwen kan n usaru “Amenuɣ n wul”, ma d isaragen ad d-ilin tlata, sɣur Ahmed Ben Allam, Yacine Si Ahmed akked Farida Ait Ouferroukh. Ma d ayen yeεnan ahil i d-yettilin ama deg tzeqqa n ssinima n Tizi Uzzu, ama deg tiqqribin (la proximité), yettili-d akka: ass n 18/12/2016, yella-d usenεet n sin n yisura deg tzeqqa n ssinima: Ґef later n yizri: tanẓirt n yiẓra, Asensi n uẓru nṬhur. Am wakken diɣen i d-yettilin usenεet n sin n yisura, amezwaru d “Tawrirt yettwattun” deg tzeqqa n ssinima n Draa Ben Khedda, ma d wis sin “Adrar n Baya” deg ulmis adelsan Maεtub Lwennas n Ain El Hemmam. Ma d ass-agi n letnayen 19/12/2016, ad yili uskan n 5 n yisura deg tzeqqa n ssinima n Tizi Uzzu: Cwiṭ seg tẓuri, Kani Kani, Salaḥ aqbayli n Palestine, D wagi i d asirem, Lukan. Am wakken diɣen i d-ttilin sin n yisura, yiwen deg tzeqqa n ssinima n Tigzirt s uzwel “Si Muḥend u Mḥend”, ma d wis sin “Ccix Lḥesnawi, seg Uxxam acebḥan ɣer wasif amidadi” deg ulmis adelsan Maεtub Lwennas. Ma i uzekka, 20/12/2016, ad d-yili usenεet n 4 n yisura, sin seg-sen “Nna Lğuher, d tameṭṭut tamxaleft” akked “Itran n Lmulud”. Ma d sin-nni-nniḍen n tqqerbin: amezwaru d “Ccix Lḥesnawi, seg Uxxam acebḥan ɣer wasif amida” ad d-yili deg tzeqqa n ssinima n Larbaa Nath Irathen, wis sin d “Si Muḥend u Mḥend” deg ulmis adelsan Maεtub Lwennas. Ma deg wass uqbel aneggaru n tfaska 21/12/2016, ad d-yili usenεet n semmus n yisura deg tzeqqa n ssinima n Tizi Uzzu: Yiwet n tedyant n later, Aḥebbas, Ṛeggmaɣ-am, Riɣ, Ґerduduc. Ma deg ulmis adelsan Maεtub Lwennas ad d-yili uskan n usaru-nni n “Adrar n Baya”. Ad d-nesmekti belli isura-agi n teqqribin (Si Muḥend u Mḥend, Adrar n Baya, Ccix Lḥesnawi, seg Uxxam acebḥan ɣer wasif amida, Tawrirt yettwattun) ur ttekkin ara deg temsizzelt-agi. Am wakken daɣen i d-ttilin isikwan (ateliers) akked waṭas n temsikniyin n tɣawsiwin yeεnan ssinima d wayen texdem tnaẓurt “Anissa”, ayagi seg 18 alamma d 20/12/2016, ama deg uxxam n yidles ama deg tzeqqa n ssinima n Tizi Uzzu. Ma d ass n 22/12/2016, ad temdel tezrigt-agi tis 15 tiwwura-s deg uxxam n yidles Mulud At Mεemmer, s tukci n warrazen i wid ara d-yufraren deg temsizzelt-agi. Farid Mahiout, d imsuddes n tfaska-agi yenna-d: “ D tazrigt tis 15 n tfaska-agi, ad d-yili deg-s ass n 22/12/2016, ideg ara nefk aṭas n warraz n tzemmurt n uwreɣ. Yal tawsit n yisura ( isura imeẓyanen, isura imeqqranen, isura n tmakfaḍut…) ad d-yifrir yiwen deg-sen, yerna ad yawi arraz. Am wakken daɣen ara d-yili warraz i lsinaryu ifazen, mebla ma ttuɣ sin n warrazen i tsuqilt ifazen, yiwen i umalay wayeḍ i wunti. Yella diɣ warraz i usegbar (acteur) ara d-yufraren deg temsizzel-agi. Ssarameɣ ad tεeddi deg tegnatin yelhan, am wakken zrint tid iεeddan. Nebɣa ad nsali aswir n ssinima d usaru amaziɣ, ɣer wanda ilaq lḥal.”
Ghani Amazigh