Am wakken ḥsan akk wid yellan deg wannar n umennuɣ adelsan, tafaska n tmedyezt tamaziɣt, d tajmilt i Dda Lmulud n At Mɛemmer, i yettmaggan deg Ayt Smaɛel d ttiɛad n wawal i d-yettuɣalen yal aseggas, imi ur yezmir ad yettwakkes seg ucḍaḍ n umezruy akken tebɣu tella teswiɛt. Daymi bdan seg tura yiɛeggalen n Tdukkla Tadelsant Adrar n Fad afras ed ufraẓ n yiqeddicen ilmend n temlilit-a tadelsant n meɣres i d-iteddun, i d-yessegrawayen acḥal d ameɣnas; gar imedyazen, iselmaden, inaẓuren, at yimussuyen idelsanen, ed wid iḥemmlen idles-nsen s umata. Dɣa, ameslay yella yezzi ussan yezrin ɣef yinebgi n yiseɣ n teẓrigt-a ed ɣef wanwa ara tuɣal tejmilt, imi seld kra n umciwer, gezmen-tt di rray yilemẓiyen n tdukkla dakken ad tili i Lwennas n Ayt Lewnis deg tefsut n 2016, ɣas ma tella tettwar-as tejmilt yakan sɣur tdukkla n Udrar n Fad, maca s tefses ahat. D tagnit ihi ad twekked tdukkla-ya ibeddi-ines ɣer kra n wid yeggulen ad ilin kan d nutni, ad asen-tanez daɣ nettat s ulama tejmilt tamecṭuḥt. Yuɣ lḥal, ma nesmekta-d inaẓuren akk uɣur terra tiṭ tdukkla-ya i d-yennulfan 21 n yiseggasen ɣer deffir, ad d-nebder Karim Branis, Ɛli Ideflawen, Zedek Mulud, akked Malika Dumran.
Akken i aɣ-d-yenna uselway n tdukkla-ya iɣef nettmeslay mass Fares Bakkuc, tura deg wallaɣen ɣas ini telḥeq-d tfaska, imi irupurtajen n kraḍ n yimedyazen i d-yufraren deg tedwit iɛeddan ur ttɛeṭṭilen ad kfun, tisɣunin n useggas atan ad ttwaceyyɛent i usiẓreg daɣen, war ma yella-d ustehzi ɣef uxemmem i tbadut tayeḍ neɣ tarrayt tamaynut ara as-yefken ugar n tiẓeḍt i usihar-a agejdan.
Mhenni Xalifi