Ccix Lmehdi, Aweɣlis, d acennay, yetturar aṭas n wallalen n tmuzigt. Meɛna win yeḥmel nezzeh d amundul. Ɛallam Lmehdi, d isem-is aḥeqqani n Ccix, ilul ass 21 deg wenber aseggas 1946, deg Tqeryett, yettabaɛen taɣiwant n Sidi Ɛic. Γer tlelli n tmurt, yebda axbac deg yenzizen daxel tdukla J.F.L.N. Γer useggas 1966, yeḍfer abrid n lɣerba uɣen arrac n tmurt. Wa yettɣerreb ɣer Fransa, wa ɣer Wehran, ma d Ccix Lmehdi yeṭṭef abrid ɣer Lezzayer tamaneɣt. Din, ldint-as-d tewwura. Akken s-qqaren s teqbaylit “bedd ad twaliḍ,; ddu ad d-tawiḍ,; qqim ulac”. Ccix Lmehdi seg wid ibedden rnan ddan ; inuda ɣef yimal-ines berra i tmurt n Leqbayel.
Yattmeslay-d s lxiq deg wul ɣef tallit yekka, d wussan yuzzel gar Lqesba d lqahwa Tonton Ville, anda yemlal d yifennanen imeqqranen n tmurt, gar-asen : Lɛenqa, Lɛenqis, Gerwabi, Deḥman, … Imar i yebda ixebbec akka deg lexyuḍ n ugiṭar, i tikelt tamezwarut gar yifennanen am Lɛanqis, Ezzahi, deg leqhawi n Lezzayer tamaneɣt. Yerna kra, sawlen-as-d ad yekki deg terbaɛt n rradyu t-II, deg tedwilt “iɣennayen uzekka”. Tezri kra n tallit, isekles aḍebsi-ines amezwaru “iɣeblan qqwan”.
Am win ur nettwaqenneɛ s tikli yedda, ikemmel yettɣerreb akkin. Aseggas 1976, isubb ɣer Ḥasi Mesɛud. Din ahat ad yaf i yessarem wul, ɣas ulamma “Iɣeblan qwan”. Deg tlemmast n sseḥra, Ccix Lmehdi yebda am uwerǧeǧǧi, s snitra, ad isedhu ulawen n wat tmurt, yettɣerben, am netta, zdaxel n tmurt. Seg tuciya ɣef listixbar ɣer leqsid akken ad yekfu ccna s zendari. Armi d aseggas 1986, yuɣal-d ɣer Lezzayer, isekles aḍebsi-nniḍen ideg llant 6 ccnawi. Yefka-t i rradyu t-II. Ar tura mazal ur s-d-igi ccan ula yiwen.
Ccix Lmehdi, yettwassen aṭas s tezlatin isedhan tisuta n tallit-is. Am ccna “Izimer n wuccen”. Deg tezlilt-a yeqqar : Izimer ɣef yiri n temda/Deg waman la yeseblaɛ/Uccen mi t-id-iwala/Yeɣli-yas-d uledda yeḍmeɛ). Akken daɣen i d-yura, i iɣenna ɣef tayri. Am yal anaẓur i t-yecban. Ccna n Ccix Lmehdi, d timucuha s tteswirat isefsan arkad deg wulawen.
Am tal tallit, anaẓur yetteggray-d dima d lefrisa n yixxamen n teẓrigin. D ayen i yeḍran d Ccix Lmehdi. Ayen akk isekles seg useggas 1987 armi d 1991, ur yeṭṭif fell-asen ulas d tasurditt.
Nessaram iɛeggalen n tmurt At Weɣlis, i d-yettheyyin Lsas ɣef yisem n ccix, ddaw n uqerru Ḥamu Abdelli, ad beddlen liḥala, ad srewlen yir tidyanin d yiɣeblan, i d-ineǧren abrid qbala ɣer tudert n ccix.
Ait Ighil Mohand