Abrid aqbuṛ n Ɛecba i d-yezgan deg wedrar d ṭṭuq neɣ (les gorges) n Xeṛṛaṭa atan ad yettwaεiwed kra yellan deg-s, s wazal 5 n yimelyaṛen n yidinaṛen (5 milliards de dinars ) ɣef leḥsab n yiwen n “ le communiqué “ n twilayt n bgayet. Abrid-ayi iweεṛen i ixeddmen deg teɣzi 7,6 n yikilumiṭren, yettuɣal i tasut wis-mraw-tẓa (lqeṛn 19) ay yebna uneḥṛas afṛansis (colonisateur français), yettwasseqdec tikkelt tamenzut deg useggas n 1870. Annect-a akk ad yessefṛeḥ inehhaṛen meṛṛa ladɣa wid n Bgayet d Seṭṭif d twilayin i d-yezzin, ma neẓra belli aqeddic-a yusa-d akken ad yessenqes tiḥeṛsi n tikli d umcubbek n tkeṛṛusin i d-yettilin yal ass deg ufalu yebdan seg Lbeṛj n Mira ar Xeṛṛaṭa. Ma nesmekta-d dakken afalu-ya i yemmuggen deg taggara n yiseggasen n tmanyin akken ad yaɣ nnuba n webrid n (les gorges) i yellan d amihan (dangereux) i yinehhaṛen, ass-a ula d netta yeččur, yessutur ad as-ssifsusen ttaεebga. Asenfaṛ-a n uqeεεed d lebni n webrid yettunefk i kra n trebbuyaε seg Lezzayer akked Ṭṭurk : Agraw uslig azzayri (groupe privé), ETRHB Haddad, akked tkebbanit Taṭurkit Özgün İnşaat Taahhüt Sanayi ve Ticaret Ltd. Ma yella yettwaqadeṛ akken ilaq wakud i asen-yettunefken, lecɣal ad kfun deg tazwara n usḍisyur n useggas n 2016, neɣ 30 n wayyuren sey-a d asawen. Abrid aɣelnaw (national) wis 9 i yeqqnen Bgayet ɣer Seṭṭif d win yemxudenqen dima deg teɣzi n wass, ad as-tiniḍ d ibaεcan ad t-yettawin, ma yella d afalu, ṣṣut i d-yettak daxel-is ad iɣil yiwen d izan ad yettgejgujen deg-s. Ikumyan yeẓẓayen i ad t-yettaɣen ugaren 45% seg wid yettεeddayen meṛṛa sey-in, imi ur zmiren ad awin abrid yessawnen deg-s, ttuḥettmen ad rren ɣer webrid n (les gorges), lamaεna aneggaru-ya d win ur nḍemmen dder n laman, acku ttilint-d deg-s kra twuɣa gar-asent taɣelyawt n yidɣaɣen imeqṛanen ladɣa deg ccetwaLecɣal n uqeεεed tttwabḍan ɣef kraḍ n yiḥricen, gar win n useggem n webrid, i ara yexdem ugraw uslig azzayri ETRHB Haddad s wazal n 900 imelyunen idinaṛen s yiwen n lweqt n 18 n wayyuren. Aḥric wis-sin yerza aseggem n lecɣal n tẓuri, anida ara naf akk muggen s lebni n yiblaḍen d wayen akk icudden i “ la maçonnerie “, yettunefk i wegraw ETRHB Haddad akked tkebbanit n Ṭṭurk s ugar 3,3 n yimelyaṛen idinaṛen, ma d lweqt n tukkfa n lxedma ur yettεedday 28 n wayyuren. Wis-tlata d win n 260 n lmitrat n ufalu aqbuṛ, wagi ad yettwaxdem sɣur wegraw aṭurki s lqidar n umelyaṛ d adinaṛ, s wakud n ṭṭulan n useggas. Ad nerr awellih dakken lecɣal ad bdun mara yettwastaεṛef ugatu (laεqed) sɣur tesmilt n leswaq izemmren (la commission des marchés compétents).
Mhenni Xalifi