.. Akken i uɣen tanumi Ibgaytiyen, Asqamu n tmeɣriwin n Bgayet, yessewjad tafaska n ccna amaziɣ ara yebdun seg 5 ar 10 deg ɣuct 2009. Aseggas-a, tafaska t-7 d tin ideg yimawlan n tmeɣra ran ad rren tajmilt i ucennay yettwasnen deg temdint n Yemma Guraya, Abdelouhab Abdjawi…
I usmekti, tafaska n ccna amaziɣ n temdint n Bgayet, tella-d i tikelt tamezwarut deg useggas 1990. Deg lawan-nni, tidukla tadelsant tamaziɣt n Bgayet i tt-id-yessewjaden. Dɣa, ɣas ttawilat xussen-as, ɣas tadrimt ur tt-tesɛi, tessaweḍ ɣer tfaska t-3 i d-yeḍran deg useggas 1993. Seg useggas 1997, d taɣiwant n Bgayet i tt-id-yessentan deg wahil n tfaskiwin n temdint. S lmendad n wufrinen n RCD akked wid n FFS n tallit-nni, treṣṣa tfaska n ccna amaziɣ,; s wudem unsib, deg wahil n tɣiwant, d nettat dɣen ara yeddmen amesruf d uheyyi-ines. Dɣa, seg yimir ur teḥbis tfaska almi d tewweḍ tikti n tejmilin i wid d-yeğğan azal deg yidles deg temdint n Yemma Guraya am Sadek Abdjawi, Zerrouki Allaoua. Meɛna tikelt-a, tis sebɛa, ad tuɣal tejmilt i unaẓur, yedder : Abdelouhab Abdjawi.
Abdelouhab Abdjawi, i wid ur t-nessin, akken i d-yenna Mass Hakim Zaidi, yiwen seg yimḍebbren n tfaska : “mazal ccna-ines ttawin-tent-id yicennayen n wass-a deg tmeɣriwin am “A bu teɛmamt d uqendur” i d-yekkaten ɣef yiminigen yerran deg ṭṭerf leɛwayed-nsen, neɣ ahat tamacahut-nni n uyaẓiḍ d wuccen “A belyaẓiṭ”, neɣ tin daɣen n “A lbabur”… Yecna d Sadek Abdjawi, yexdem deg rradyu n Bgayet deg yiseggasen n 60. Ass-a, atan deg Fransa am tuget n yifennanen n tmurt n Leqbayel.”
Ahil n tfaska yebḍa ɣef sin n yiḥricen imeqqranen. Aḥric n ccna d ccḍeḥ ara yessedhun Ibgaytiyen. Ad yili ccna deg waṭas n yimeḍqan n temdint n Bgayet am tzeqqa n yidles Taos Amrouche, Axxam n umezgun Malek Bouguermouh, deg la place Gueidon, atg. “Nessaram ssya d asawen, ad nernu ad naẓ ɣer tɣiwanin n twilayt n Bgayet, akken ad as-nefk udem ajdid i tfaska.” i d-yerna Mass Zaidi. Aṭas n yicennanyen yettwassnen ara yesseḥmun taqaɛet am Boualam Chaker, El-Ghazi, Abranis, Akli Yahiaten, Abdelkader Bouhi, Cheikh Lmehdi, Azerzour, Taos Rehab, rnu ɣur-sen win yewwin ilindi arraz amezwaru deg tfaska t-6 : Methia Arezki.
Ma d aḥric wis sin, d amyezwer gar yilemẓyen deg taɣulin yemxalafen n ccna. Aseggas-a, ilmend n 5 wussan, azal n 45 n yifennanen n uzekka, ara iɛeddin deg uɣerbal n yiɛeggalen n tesqamut n uskazal, gar-asen yella Mohand ait Ighil, Malek Bouchebbah, Samir Choubbane.
Akka, ɣas d aɣamac, abeḥri n lebḥer deg yiḍ d tablabat yeslufuten udmawen n wid i d-yerzan ɣer Bgayet, yettrus-d yes-s cwiṭ n tesmeḍt, i d-igellun s yimesnebda (les vacanciers) ɣer tzeɣwa i unezzeh d ccḍeḥ deg tmeɣriwin i d-tessewjad tɣiwant n Bgayet. Dɣa, ɣef yiles n lɛama, yella-d wawal ɣef yidles iɛummen tizeɣwin n temdint n Yemma Guraya deg unebdu n useggas-a.
Djamal Ikhlufi