Ddurt iεeddan, tasebḥit n wass n letnayen i d-yewweḍ lbabur n ṭṭrad « Sumam » ɣer lmersa n Bgayet. Lbabur-a ddan-d deg-s wazal n 90 yinelmaden ifesyanen n uɣerbaz aεsekri n yibeḥriyen yellan deg Tamenfust. Tikli-ya i ikecmen deg wahil n usileɣ n yinelmaden n uɣerbaz-a tebda deg wass n 09 yulyu, d tin ara idumen alama d 18 deg ɣuct i d-iteddun.
Γef wakken i d-yemmeslay i tɣamsa yellan deg umkan, win yetkeflen s yisallen deg lbabur-a : “tikli-ya tettusemma d tamezwarut i d-yewwin yid-s inelmaden yeɣran s uslugan LMD yellan d amaynut”.
Tikli-ya ara yekken ɣef teɣzi n 40 wussan, deg-sen 25 d tikli deg waman ma d 15 nniḍen i uḥebbus deg lmersat. Ladɣa deg lmersa n Bgayet anida yeḥbes lbabur-a i teɣzi n 3 wussan. Fursen deg-sen yinelmaden tagnit akken ad ẓuren aṭas yimukan n umezruy. Yuɣ lḥal ḥebsen yakan uqbel Bgayet deg lmersa n Tunes d win n Trias (Ṭelyan). Mbeεd Bgayet, lbabur « Sumam » ad iruḥ ɣer Lukrani, ma d aressi-s aneggaru ad yili deg lmersa n Lezzayer Tamaneɣt.
Mokrane Chikhi