Akka i ḍerrunt, akka i ferrunt ! timlilit tamezwarut n terbaɛt taɣelnawt zdat Malawi tesssazzel tidiwin tisemmaḍin deg yizzayriyen. Mačči d lexsara ahat i iḍerrun s waṭas, maca d agemmud ẓẓayen n temlilit i ixerben tirga. Ulac win ara yamnen d akken Ziani d yimeddukkal-is ad d-yeɣli fell-asen yiwen n udrar yecban wa. Imdanen uɣen-tt mkemda, ssusmen. Ulac win yufan amek ara d-yessefhem tawaɣit-nni. Isallen ttazzalen s ya ɣer da, ttmeslayen-d ɣef yimenɣi gar yimyurar, wiyaḍ ɣef lḥir irekkben wid yetturaren di trebbaɛ tiberraniyin I yugaden ad sɛun iɣeblan. Lḥasun, « Radio trottoire » yegget, yal wa s wacu icennu. Imi, ala annar I d-yettakken tidet, ata-n nwala timlilit n terbaɛt taɣelnawt zdat Mali. Taneggarut-a, d tarbaɛt s wazal-is. Imyurar nneɣ,; kecmen deg urar s yiwet n tteɛzima i rrbeḥ. Weɛden, ṭṭfen deg wawal. « Le Magic », yebna aɣrab di temḥaddit tazzayrit, ɣer tama-s Halliche, win akken yuran iswi n terbaɛt. Di tlemmast, Karim Ziani, isedduy ddabex amzun akken yetturar ddama, yekkes akukru I yimeddukkal-is.
Ass-a, imi asirem yuɣal-d, Belhadj d wiyiḍ ḥsan acu i ten-yettrajun i wass-a, zemren ad aẓen ɣer zdat, ad d-awin agemmuḍ yessefraḥen. D lwaǧeb asirem ad yili !
M. Smail