Adrar n Yemma Ǧewwa, qrib 1000 n lmitrat i yeɛlay ɣef uswir n lebḥer. Mi tuɣeḍ abrid ɣer din ad tḥusseḍ deg yikilumitren imezwura s facal n ubrid yessawnen yerna yezzi. Meɛna mi tdehmeḍ ɣer daxel ugama yersen din, ad tettuḍ iman-is s ccbaḥa akk i d-yezzin. Ad d-tettmektiḍ umbeɛd tafaska.
Tasebḥit n wass 05 ɣuct, abrid n Ticci yeččur, wa iteddu ɣer uftis, wa iteddu ɣer tfaska n Ǧewwa. Acu lxilaf gar-asen ? Ulac. Meɛna ɣer ubrid numru ɛecra, mxlalafen iberdan akken mxalafen teɣdiwin (orientation). Win i d-yeɛnan tafaska ad yeḍfer abrid numru ɛecra. Win i d-yusan iman-is ur iɣelleḍ. Lmukelfin s lecɣal sekren limarat s teɣzi n ubrid. Yiwen ur iɛerreq.
Mi yewweḍ yiwen d asawen, anda tezga tɣerɣert i d-ijemɛen akk imdanen i d-yerzan, ad twalaḍ abrid-nni n zik yettawin ɣer taddart ibeddel ssifa. Da d aḥric lbiɛ d ccra, da d abraḥ n yisaragen, da d abraḥ n wučči d usgunfu, atg.
Γas akka, tiḥuna i d-sbedden mazal ur ɛmirent ara, acku, gar wid i d-yerran s wawal, yal wa acu n sebba i t-yeṭṭfen akken ad iɛeṭṭel ur d-yettaweḍ ara zik. « Maca ccɣel ad yefru. Akken leḥḥun wussan ttefrurint tlufa », akken i ɣ-d-isefhem Idres ℇebdelkrim, yiwen seg yiɛeggalen n Tdukla. Ula d yiwen mačči yebra i yiɣalen, ccɣel yebda ilaq ad d-yekfu. « Win i mazal ur d-yewwiḍ,; ad t-nraǧu, amḍiq-is iheyya », i d-yerna awal fell-as Yusef Xelfawi, aɛeggal-nniḍen.
Učči i d-heyyan At tfaska, d win anda amdan ad yemlil d udrar s timmad. Ulac lbaṭaṭa teqla, neɣ ayen xfifen. Učči da, ɣur-k lxetyar gar tiɛesbanin (tikurbabin) neɣ seksu, … deg yiqiḍunen, neɣ deg berra i ubeḥri n tmurt n Wat Bimun.
Deg yiḍ,; yebda uḥric n ccna. Ass-a, ttwanecden-d Buǧemɛa Agraw akked Akli D. Sedhan lxawa armi d luǧuh n lweḥda n yiḍ.
Γas akka yella lixsas, deg uheyyi, maca ilaq ad d-nawi lexber belli taluft ur telli meẓẓiyet akken ad tɛeddi. Yerna i tikelt tamezwarut, tekmel, ur yettili cwiṭ lixsas.
Ait Ighil Mohand