Ǧamal Arezqi, d amaswaḍ n tutlayt n tefransist deg Tubiret seg useggas n 1998 ɣer wass-a. Ilul deg Tezmalt ( Bgayet) deg useggas 1966. Yesɛa agerdas n Maîtrise deg tsekla tartart n tefransist i d-yewwi deg tesdawit n Paris 8 (Fransa) deg useggas 2005. Uqbel yella daɣen (yerna mazal-it) d ameɣnas n Tmaziɣt seg yiseggasen 1980 asmi yella yakan d anelmad deg uɣerbaz alemmas. Yella gar yimḍebbren n umussu adelsan Amaziɣ. D aɣerbaz ameqqran anda i d-yelmed aṭas n tlufa n tudert d tid n tsertit, akken d-yeqqar s timmad-is. Deg useggas 1988, yuɣal d aselmad n tefransist alarmi d 1996. Syin yuɣal d amaswaḍ. Seg 2002 ɣer 2007, yuɣal d amaswaḍ n Tmaziɣt deg Tubiret anda yeṭṭef aɣerbaz amenzu, d ulemmas akked win n tesnawit. Seg wasmi yella meẓẓi, iḥemmel Tamaziɣt imi yeṭṭeḍ-itt-d deg twennaḍt anda i yettidir. Degmi iḥemmel ad yaru s Tmaziɣt neɣ ad d-yesuqqel iḍrisen seg tefransist ɣer Tmaziɣt. Akken daɣen i d-yessufeɣ aṭas n yimagraden deg tɣamsa taɣelnawt. Seg useggas 2004 d asawen yella yettaru deg yeɣmisen Le Matin, Le pays Tamurt, d La Dépêche de Kabylie. Deg useggas asdawan 2008-2009, yesselmed Tamaziɣt deg tesdawit n Tubiret asmi yeldi i tikelt tamenzut ugezdu n tutlayt d yidles amaziɣ. Tura mazal-it d amaswaḍ n Tefransist deg Tubiret-Imceddalen anda i yezdeɣ,; maca daɣen yettak-d afus n lemɛawna i Tmaziɣt ama deg Bgayet, Tizi Wezzu, Bumerdas neɣ Tubiret imi itekki deg yal timlilit ara d-yilin ilmend n Tmaziɣt. D netta i d amenzu i igan assaɣen gar yiselmaden n Tmaziɣt d tesdawit n Paris 8 ukud d usqamu Unnig n Timmuzɣa i d-yeglan s temliliyin i d-yebdan seg yennayer 2007 deg Zéralda ɣer tura s lmendad n Naser At Waɛli. “Ayen akka xedmeɣ i Tmaziɣt, ɣas yegla-d s waṭas n wuguren, d ayen i yi-yernan afud d tissas iwakken ad neddu ɣer zdat imi tura ulac ccek, Tamaziɣt tezmer ad tili d nned n tutlayin-nniḍen, yegra-d kan ad nxemmel i yiɣallen nneɣ.”, i d-yenna Ǧamal Arezqi. Asirem-ines ameqqran d tuɣalin ɣer Tmaziɣt deg yiseggasen i d-iteddun d usufeɣ n yidlisen-nniḍen s tutlayt tayemmat. Idlisen uran yakan. Adlis amenzu Akal d wawal, amud n tullisin, i d-yeffɣen deg mayyu yezrin sɣur tizrigin Tira n Bgayet, d ayen yeffren yakan, d lufer n wayen yeḥrez deg yidles d tutlayt n Teqbaylit. Akken i d-yenna daɣen tira s tutlayt tayemmat dayen ara d-yerren tisas d wazal i yidles-nneɣ,; acku ma yella mačči d nekni ara t-igen, werǧin ad t-xedmen wiyaḍ
Dj. Ikhloufi