Azal n 5 wussan d wuḍan, i tuzzel targa n yisefra deg wannar n Timizart n At Jennad ilmend n tfaska t-7 tmedyazt tamaziɣt “Si Muḥend u Mḥend d Yusef u Qasi” i d-yellan ussan-agi yezrin. Tadwlit-agi, tella-d d tajmilt i sin n yimedyazen i d-igan lsas i tmedyazt tatrart n teqbaylit : Ben Muḥamed akked d Hajira u Bacir. Ulɣu n tfaska yeqqar “sin n yimedyazen yiwen usekkud”. Di tadwilt-agi yezrin, yewwḍen ɣer yiswi i as-gan imsuddas–ines, aṭas n umaynut i d-yellan imi nnig timsizelt s yisefra, tella-d diɣ temsizelt n tmezgunt s tmedyazt. Ayen yeṭṭfan lbal deg wanact-a, d aswir yulin aṭas wuɣur telḥeq tmedyazt d-wwin yimedyazen yekkin deg 2 temsizlyin-agi. Aṭas n umaynut swacu i d-glan yimsefruyen, ama deg wayen yeεnan isental, aɣanib akked timenna n isefra. Kra win iḥeḍran din yeswa-d deg lεinser n wawal ziḍen, lqayen, yeččuren d sser akked d lmaεna. Imsefruyen rẓan lqid n ukukru, sneḍqen amrar n uglugel zdat umyag n teqabylit, dahmen annar n ucqirrew akken ad d-inin akken-nniḍen kra i ten-iceɣben. S wakka reṣṣan tamedyazt taqbaylit deg tasga n talsa, suksen-tt-id seg timawit akken ad tilli deg wagni n tira. Isefra n Mass Aḥmed Twil yewwin arraz amezwaru d amedya iwatan ɣef wanecta.
Deg wayen yerzan tamezgunt s yisefra, Aḥmed Laḥlu ur icuḥ ara ula d netta, imi yesseqdec merra alallen yellan ama n temsliwt neɣ n temẓriwt, d acu yeǧǧan tesqamutt n ufran ad as-tefk arraz amezweru i netta akked d tarbaεt-is.
Lewhi yerra diɣ ɣer tamsiwt Dali Salima yewwin arraz wis sin, imi xas akken meẓẓiyet (17 yiseggasen di leεmer-is), maca tessewhem kra win i as-yeslan s telqey n yisefra-ines akked ccbaḥa n wawalen-is.
Tafaska-agi deg wudem-is w-7, tejmeε-d deg yirebbi-s iqdimen n umaṭaf w-2 am Aḥmed Umaziz, Said Zanun, Buxelfa yerran ad kkin deg tejmilt yuɣalen i sin yerfiqen-nsen : Ben Muḥamed akked Hajira u Bacir. Si tama-nniḍen, tamusni ur tuɣal ara ɣer rrif, imi isaragen d-yewwi Mass Saεid Cemmax akked Ḥasen Ḥalwen d Yusef Merraḥi, rran lwelha ɣer wazal n tmedyazt di tmetti.
Mebla cekk, tamusni tuzzel deg targa n tfaska-agi, i d-yesbegnen ma tedda tasa akked wul, ur yelli acu ibeεden neɣ acu iweεren. Akken yebɣu xussen wallalen s ucqirrew akked tebɣest i d-yettili kra. Am wakken i d-yenna umaray n tfaska : “s lebɣi iteddun igduden ɣer zdat, ihi ulamek ara s-nerwal i ubrid n tidett. Taqbaylit, ass-a, tuɣ abrid n tnenflit »
Ait Slimane Hamid