Ussan n usgunfu d uḥewwes, remṭan, akeččum ɣer uɣerbaz, lɛid tameẓẓyant, ala ayen i yessedramen tamɛict. Yerna, ikemmel-as Uyeḥya s tukksa n yireṭṭalen. ɛic ay aẓawali ! ɛic ay aceɛbi arqaq !
Anebdu n useggas-a imerret akk izzayriyen. Yiwen ur as-yertiḥ i lmerta-s ! Yeffunzer ulɣem s uzɣal d uɣamac idummen. Tidi tesriddim deg-neɣ s nnda yezgan. Times tuɣ deg tẓegwin. Ma d tuɣac qqurent seg lixsas n waman ; ma llan, ulac isemmaḍen imi trisiti tettnegzam. Lḥasun, mlalent-as-d i uzzayri n wadda. Yeqqim-as-d ssber d ttmer imi ula d Uyeḥya yennawel-d yiwen lqanun n tedrimt (LFC 2009) yesserfan akk lluma : les banquiers, wid i yeznuzzun ṭumubilat, wid i d-yettawin sselɛa seg berra n tmurt, imɛellmen izzayriyen, aceɛbi daɣen.
Rnu-yas-d imir si remṭan. Ayyur i d-yettuɣalen yal aseggas, i yuɣalen d taɛkemt ɣef lluma-s. Deg ssuq, ur d-yeččaray uqeffu, awi-d wa neɣ eğğ wa ! Lxeḍra terna, ma d lfakiyya seg zik i tenneqḍaɛ ɣef uceɛbi meskin. Ttcektin akk, am win yeznuzzun s ljemla, am win yeznuzzun s lkilu, am win yettaɣen ! Anagar Si Djamal Ould Abbas, aneɣlaf n “taḍamun”, i yettzuxxun yeqqar mazal. Yerna yenna-tt-id daɣen aseggas-a, ad sfaydint qrib amelyun d 300 alef n twaculin s tquftin n remṭan. D lḥukuma-nneɣ ara yeddmen lexlas-nsent ! Amelyun d 300 alef n twaculin i yenḥafen deg tmurt-nneɣ s wudem unsib. Ma nenna-d kan, yal tawacult s 5 yiɛeggalen ; leḥsab ameẓẓyan, ad aɣ-d-yessufeɣ ɣer 6 yimelyan yizzayriyen i yenḥafen deg tmurt-nneɣ. Terwi ! Ziɣen, s wudem unsib 20% i yelluẓen deg tmurt ideg 140 yimelyaren n dullar rrsen deg lbankat n berra, ideg lpitrul yettrefrif.
Meɛna, akken i d-yenna Ḥamid : “nekni s yizzayriyen, ur nxeddem, ur d-nesniɛ kra, kulci nettaɣ-t-id seg berra, neqqar lḥemdullah”.
D. I.