Ddaw leɛnaya n uselway n tɣiwant n Beclul, asnaray n yidles d win n waddal i yellan di temnaḍt-agi heggan-d yiwet n tmeɣra ilmend n usmekti w-53 n ugraw n Summam. D yiwet n tewriqt n umezruy ara d-ikeflen iwakken yiwen ur itettu izmawen nni iferzen timsal di lawan ideg yeṭṭerḍiq uɛbar. D tajmilt i yuɣalen i Abane Ramdane, win akken iwumi qqaren “L’architecte de la Révolution”. Tameɣra-agi tebda s usmekti n wass n 20 di ɣuct 1956, awal i d-yewwi win yettmeslayen s yisem n yimjuhad n Tubiret. Ssakin, d tameɣra tameqqrant i d-yesduklen inaẓuren n temnaḍt-agi. Asirem n wid i d-iheggan ahil-agi amer ad afen afus n lemɛawna sɣur yimḍebbren n tɣiwant akken deg waggur-agi n remḍan ad ilint aṭas n tmeɣriwin.
M. Smail
Ilmend n usmekti n umulli w-53 n uswir n Summam 56, tidukla tadelsant “Tudert” akked usqamu anaddal n taddart n Lmecta, heggant yiwen n wahil d amerkanti.Di tazwara, yella-d usterḥem ɣef 74 yimeɣrasen n taddart, i yeɣlin ɣef timunent n Lezzayer. Tameddit, tella-d temlilit n ddabex-uḍar gar snat trebbuyaɛ n yilmeẓyen, syin akkin d imeqqranen gar-asen.Deg yiḍ,; yella leqdic adelsan yufraren d yiwet n temzikent ɣef lgirra n Lezzayer. Tkemmel ssehra s snat n tceqqufin n umezgun. Tamenzut, “Wa tewwet-it, wa tseḥnunef-it”, uraren-tt-id kra warrac n taddart n Fetḥun. Tis sant, d Karim Bubul n Sedduq deg “Qahwat Muḥ”. Γer taggara, yella-d ufraq n warrazen i trebbuyaɛ n ddabex-uḍar am tid irebḥen am tid ixesren, terna-d tmeɣra n ccna.
B. Benhamouche