« Sarameɣ ad ilint aṭas n leqhawi am ta-inu deg Bgayet. Leqhawi yellan deg la place Guidon, zemrent ad ilint axir n wayla-w », d awal amezwaru n Bizak mi neqqim ad d-nawi tameslayt yid-s.
D acu-t umgirred yellan d leqhawi-nniḍen ? D tidet kan : ṭṭwabel d yikersiyen kifkif, lkisan d yifenğalen furmen, ur mxallafen ara. Seg wasmi i yeṭṭef Bizak lqahwa-yi, amkan ibeddel, beddlen ula wid i yettizzin din. Wid yettɣimin din, d inaẓuren n temdint n Bgayet. Ttasen-d akk ɣer lqahwa n Bizak imi amkan yecbeḥ,; rnu-as i ccbaḥa-ya leqdic adelsan i d-yettilin din. Yal iḍ,; wiss anwa ara tafeḍ yettqessir ɣef ugiṭar, anta tarbaɛt ara yuraren taceqquft n umezgun, anwa asaru ara twaliḍ,;… Lḥasun, leqdic adelsan yemgarrad, d ayen i yettağğan wid i d-irezzun nnecraḥen, dɣa ttɛawazen imi Bizak ileddi almi d 2 n yiḍ.
Lḥasun ula d Bizak, amɛellem n Lqahwa, d anaẓur. I wid ur t-nessin, Bizak yella d ameɣnas n umussu Adelsan Amaziɣ (MCB), d ameɣnas n tugdut, d amyurar n umezgun. Tura, atan yessalay taceqquft n umezgun “agellid ameẓẓyan” d warrac imecṭaḥ deg uxxam n yidles. Γef waya yenna-d : « ssarameɣ asmi ara fakkeɣ asali n tceqquft-a, ad tt-id-uraren da, deg lqahwa. »
I yisem-is lqahwa-ayi a Bizak ? « Ah, a win yufan d wid i yettizzin da, ara d-yefken isem i lqahwa », i d-yerra. Atan ihi, amek i yettxemmim Bizak, ma d isem la bdan qqaren-as “lqahwa n Kateb Yacine”.
D. I.