Aseggas-a ur yecbi ara wid yezrin ɣer yiselmaden n tmaziɣt i yellan xeddmen s leεqed. Imi, tikelt-a, ass n tuɣalin di 06 ctember, rzan ɣer yiɣerbazen-nsen, ufan d akken llan yimukan-nsen, uɣalen mebla leεyaḍ d tazzla ɣer tenmehla n usegmi n Tubiret. D ayen yessefraḥen imi d asirem i d-yuɣalen i wigi yerwan lḥif d umdegger di yal tazwara n useggas aɣurbiz.
Ilaq kan ad d-nesmekti belli iselmaden-a di 38 yid-sen, ssufuɣen-ten si lxedma yal taggara n useggas, iwakken ad ten-id-rren deg waggur n tuber. Sserwan-asen tazzliwin, almi wwḍen deg useggas n 2007, ruḥen s axxam n tɣamsa Tahar Djaout di tmanaɣt qqimen acḥal n wussan i laẓ,; iwakken ad d-jebden lwelha n yimḍebbren n teɣlift n usegmi ɣef liḥala ideg ttidiren. D yiwet n tigawt s wazal-is i yeǧǧan yiwen seg yisertiyen n Tubiret, Kara Mohand Sghir, yessaweḍ-iten mlalen akked uneɣlaf Benbouzid, i ten-id-yerran s imukan-nsen. Seg yimir, uɣal xeddmen.
Ɣef wakken i d-nnan, aḥric ameqqran seg-sen ttwaxelsen yakan, wwin tijernanin-nsen. Ayen i ttrajun tura, d asiweḍ s amsawi n liḥala-nsen, s tukksa n uxeddim s leεqed, iwakken ad uɣalen d iselmaden s wudem unsib.
M. Smail