Γef teɣzi n ddurt, si 30 di ctember ar 5 di tuber, axxam n yidles Mulud Mεemmri yeldi tiwwura-s i tfaska tadelsant n tẓuri d yidles aɣerfan n temdint n Mεesker. Ilmend n waya, yettwahegga-d yiwen n wahil d amerkanti ; timsikent d tameqqrant ɣef Limir Ɛebdelqader : tameddurt-is, ayen yettwarun fell-as, kra n tɣawsiwin-is… Am wakken, wid ara yerzun ɣer uxxam n yidles n Tizi-Wezzu, zemren ad walin leṣnaf n tgella n temdint-a akked d llebsa n temnaḍt-a. Zyada ɣef wanect-a, ad yili ccna d tmedyazt sɣur tirebbuyaε d yinaẓuren i d-yeddan ilmend n tfaska-a.
Ɛlaḥsab n wahil, kra n trebbuyaε,; ad cnunt di temdinin-nniḍen : Larebεa n At Yiraten ass n 1 di tuber, Draε Ben Xedda ass n 4 di tuber, atg.
I usmekti, d lwali n Tizi-Wezzu i yeldin s wudem unṣib tafaska-a, am wakken yella ɣer yidis-is unemhal n usegmi n lwilaya n Tizi-Wezzu imi netta n Mεesker.
“Aṭas, gar wid i d-nemlal, i yettnadin ma wwin-d imeεeskriyen-a yid-sen timseḍsa tijdidin.” Nezmer kan ad d-nini dakken ferḥen aṭas s tirza-nsen ɣer Tizi u fkan-d udem igerrez dayen kan.
Lhocine Ourezki