Almi d ass iɛeddan n 14 deg ɣuct 2016, i d-iɛum lebḥer n yimezdaɣ n taddart n Ayt Idris, taɣiwant n Tsexriwt, i yeggugen s wazal n 55 n yikilumiṭren seg waɣir n Bgayet. At temnaḍt-a tamsedrart reglen ass n acer 14 deg ɣuct abrid aɣelnaw wis tẓa (9), ugin ad tili tikli n tkeryas imi ur muggent teɣladin n tɣellist (parapets de sécurité) deg Yifalan. Ass-nni dɣa d igiman (luluf) n tkeryas i yessetnan d tazrart ta deffir ta, tasebḥit n wass, ulac sanda ad rrent. Almi d-yerza uselway n tdayra iqennaɛ-iten-id mi d-yenna ur ttɛeṭṭilen ad bdun n lecɣal-is imi tarmist (entreprise) tettwaṭṭef yakan. Sebba n waya aṭas i tt-yeẓran, imi teqqen srid ɣer twaɣit n usehwu (accident) n tikli i d-yeḍran ass n 10 deg wayyur-a deg ubrid iweɛren n Yifalan, yegla s ukuẓ n yiẓiɣren. Tlata seg yiwet n twacult, tayeḍ d tayyawt seg Rrif, tesbeḥ-d i twacult-nni yakan. Ass-nni, yuɣ lḥal abrid-nni yella yebzeg s tmiqwa timezwura n ugeffur i d-yeɣlin fell-as, rrant-t d amaccag. Mi d-isubb syin umerḥum bu 36 n yiseggasen, yecceg yerwel-as ukamyun-is ɣer ucruf. Seg setta n yiterrasen i ttuɣ deg-s, ala snat n tegrudin i yeddren s kra n lejruḥ, ɣlint-d mi akken yettekruttay deg ṭṭuq ukamyun-nni. Abrid n Yifalan dɣa, seg waṭas aya netta yettban-d d amihi ameqqran i wid yekkan seg-s. Maca wid i terza taluft n uqeɛɛed ur d-rran awellih i ɣur-s, ɣas aṭas n yinehharen i t-ineccden deg tallit n unebdu ladɣa. Ulama sseknen-aɣ-d yimḍebbren n tɣiwant n Tsexriwt yiwen n ukaɣeḍ i ufrag n umkan-nni, mu ssawalen Taɛettabt, i yettuɣalen i useggas n 2013 aya !
Mhenni Khalifi