Ttlata, 16 deg ɣuct
D tmeɣriwin deg Bouzéguène : zyada ɣef tid n zwaǧ, xelqen-d tiyaḍ i jebden seg wassaɣen i ten-icerken akked ugama d yidles. Akka ara naf tameɣra n tamamt, tin n yimɣan n usejji, n lkermus, n tbexsisin, n ubernus…atg. Deg Bouhamza, tella ula d tameɣra n yifellaḥen n udrar ! D tameɣra, diɣ, ɣer Dihya, suffeɣ-d yiwen album iwumi tsemma ‘’Amor, Amor’’.
Larebɛa, 17 deg ɣuct
D tajmilt i Muḥya, ababat n umezgun aqbayli, deg Yililten yerna netta (Muḥya) ur iḥemmel ara ad t-id-addren medden. Lukan ad d–yuɣal, ad d-yaf anect n uhetwir i yekkren fell-as, ad d-yini ‘’Mebla Rebbi ma mmuteɣ dɣa. Ma Sadmi s lferḥ d ameqqran i d-yemmekta tarbaɛt n JSK (JET) n zik-nni asmi i ileɛɛeb. Yemmekta-d Khalef akked Zivotko. Ɣer Yicawiyen, rran azal i Dihya. Rran akken yella usebdad-is i sserɣan Wat ṭṭlam ass-nni n 12 ɣuct 2016. Yiwen uqcic ameẓyan n Wat Yanni, yeɣli-d meskin ɣef upuṭu mi i t-tewwet trisiti, ur yessaweḍ ara tarwiḥt ɣer sbiṭer.
Lexmis, 18 deg ɣuct
D tafaska n ccna deg Bgayet : Bgayet telha d rruḥ n yicennayen. Yecna din Asma, El Ghazi, Nadia Baroud d wiyaḍ. Ma d Youcef Guerbaz, yerza-d ɣer uɣmis La dépêche de Kabylie. aṭas i iqesser akked yixeddamen n uɣmis-a. Ula d acennay Kamel Igman, yessufeɣ-d album ajdid. ‘’C’est sa raison de vivre’’ ɣef wakken i d-yenna s timmad-is
Sebt, 20 deg ɣuct
Asmekti n Ugraw n Soummam asmi akken i bɣan ad bnun Lezzayer ɣef lsas iṣeḥḥan. Tzad deg-sen nneyya d tirrugza. Ma d El Hadi Ould Ali la d-yeqqar d akken Bgayet tuklal kter n waya. Yeṭṭuqet wawal ɣef tmurt n Leqbayel deg ussan-a, yusa-d ula Dr Hugh Roberts ɣer Tizi Uzzu, yemmeslay-d ɣef udlis-is ‘’Alegérie-Kabylie : étude et intervention. Ulac aɣilif imi tella temlilit n JSK-MCA i wid iḥemmlen ddabex n uḍar.
H.Moula