Ɣef wakken i teddun lecɣal yerzan aḥareb n tjara mebla ttriḥ, yettban-d dakken mačči d aṭṭan ara inegren s shala. Aya nettwali-t yal ass, di yal amkan u di yal tamnaḍt. Deg temdint n Tubiret, tella-d yakan deg wagguren yezrin yiwet n lḥemla n uqḍaɛ n lbiɛ mebla ttriḥ s usexdem n yiɣil n ddula. D iǧadermiyen s timmad-nsen I yeffɣen s abrid aɣelnaw wis 5 iwakken ad sbeɛden imsenza irehnen azgen seg ubrid. Mačči s shil I d-yella waya, imi yeḍra-d yiwen n cwal d ameqran, and aula d arrac imeẓyanen gren-d iman-nsen iwakken ad d-wwten s yiẓra iɣallen n laman. Seg wassen, yexla umkan, yuzdag ubrid, iban-d ziɣ yewseɛ. Meɛna, akken I qqaren: win I iɛerḍen tacriḥt n tsekkurt ur iqenneɛ ara, bdan widak-nni iwulfen rrbeḥ s lemɣawla ttuɣalen-d ɣef yixf n tefdent. Yal ass, ad yili yiwen, ad d-isers cwiṭ kan seg sselɛa-ines, yettqaraɛ aniwa ara d-iḥebsen. Tura akken d wid yesnuzun ddellaɛ d ufeqqus I d-irezzun s amkan-a, d acu kan melmi walan takerrust n yiǧadarmiyen, ad refden iman-nsen, ad rewlen. Ɣer melmi ? Ɣef leḥsab n waṭas n leryuy I d-yufraren deg yinejmuɛen, astixxer kan akka ur yezmir ad yefru taluft. Ayen iwulmen ass-a n wussan d asewjed n yimukan I win yebɣan ad yexdem, s yin, d asexdem n lqanun ɣef win akk ara ixalfen.
S. M