Akken uɣen tannumi yisdawanen n Tubiret, uragen-d s abrid ass n, 13 deg maggu iεeddan, ssuturen ad yeqleɛ udabu akked unagraw seg yiẓuran. D tamesbanit-agi uɣur i d-yessawel Umazday ilelli n yinelmaden (Collectif des étudiants libres), tebda ɣef 11h seg tesdawit Akli Muḥend Ulḥaǧ armi d lwilaya. Lḥan deg-s yinelmaden s wannay n Lezzayer, annay n yimaziɣen.
Am waken i d-yella, diɣ, ɣer tama-nsen ula d yiwen n wannay azeggaɣ n yisddukkliyen (Communistes). Ɣef teɣzi n tmesbanit-a, ddan yisdawanen s umgarad n tektiwin d initen deg talwit u s tuɣac n ddkir am ‘’Ǧǧet-aɣ abrid ad nεeddi » n Ideflawen d ‘’Pouvoir assassin » n Uleḥlu, « Mazal-aɣ d igrawliwen », « Ad neddu alamma yeɣli udabu ». Maca asuɣu yugten d wi: « Tuddsiwin senzent inelmaden » akked « Tuddsiwin senzent tasdawit ». Imi amennuɣ n yilelliyen n Tubiret i usizdeg n tmurt d amennuɣ i usizdeg n tesdawit seg tuddsiwin yeskuffren tilelli d tugdut.
Nisma Tigrine