Tidukla n yinfarasen n tazart n Twilayt n Bgayet, yezgan deg tɣiwant At Imɛuc, theyya-d i tikelt t-8, aseggas deffir wayeḍ,; tameɣra n tazart. Tin i yeṭṭfen sin n wussan 29 akked 30 deg wayyur ideg nella.
Amḍiq xtaren aseggas-a, akken ad d-sbedden tameɣra n tazart, ur yelli d win n yal aseggas. Asegas-a, xtaren aɣsur n usilleɣ (C.F.P.A) n At Imɛuc. Deg-s, beddent-d texxamin, ara ɛemren azal n 120 yifellaḥen s leqdicat-nsen s umata. Γas ma yella isem tuɣ tmeɣra, d win d-yettwellihen ɣer tazart, ayen i d-yettwafesren yerza tafellaḥt s umata ; hah d afermaj, hah d tament, hah d ifelfel n tensawt, … acu kan tazart d tin yeggten. Wid ara yaɣen neɣ wid ara izenzen, rzan-d seg Tizi Wezzu, Ssṭif, Lberj Buɛrarij, atg. Akken dɣa i d-fkan kra yimassanen n tfellaḥt isaragen ɣef wayen yeɛnan tafellaḥt s umata.
Ma d ayen yeɛnan lɣella n tazart, aseggas-a, ad naf tenqes. Ifellaḥen jemɛen-d 120 000 yiqenṭaren deg wanda ilindi jemɛen-d 160 000 yiqenṭaren. Sebba waya, wid nesteqsa akk mtafaqen belli lɣella tenqes acku lḥukuma ur d-tḍal ara ɣer urmud-a n tazart.
Aseggas-a, tameɣra tejba akkin i tilas taɣelnawt, tuɣal d tagraɣlant : yiwen n ufellaḥ yejba-d seg tmurt n Fransa. Daɣen, imassanen n tazart, mlan-d i yimezdaɣ acu zemren ad d-xedmen s tazart nnig wučči-ines.
Γer taggara, Lwali n Bgayet, yenna-d belli taɣiwant n At Imɛuc, d tin iwumi d-uɣalen 40 imelyaren n sentim, deg P.P.D.R.I.
Ait Ighil Mohand