Zik mi yuget lḥif, yiwen urgaz inṭeq ar yemma-s:-A yemma, γur-m tameṭṭut-iw, d yessi, nekk aql-i ad awiγ lleft ad zegreγ akkin s At Yaεla i wakken a t-id-beddleγ s yirden d zzit, tlata neγ ṛebεa wussan a d-zziγ. Iruḥ urgaz γas akken ideflawen γman γef yidurar maca akka i d aγrum, deg uxxam tullas ttrunt ugint ad gnent, tenṭeq γur-sent yemma-tsent:-D lawan n yiḍes a tullas azekka a d-yas baba-tkent a d-yawi irden d zzit, ad sebbweγ seksu s ubisar ad teččemt alamma teṛwamt imir ad tegnemt di talwit.
Dγa ṭṭsent. Tayemmatt yugi ad tt-id-yas yiḍes, s teγzi n yiḍ nettat teqqar-as mmi tečča-t tizi, mmi ahaqel nγan-t yiεdawen awah! Balak mmi illuẓ immut. Azekka-nni yusa-d urgaz iwwi-d irden d zzit d ubisar, ih ferḥen meṛṛa, tameṭṭut:-Annaγ ay argaz, tullas-agi inek ur d iyi-ğğint ara laεca ad ṭṭseγ armi sent-id-wwiγ timucuha, nniγ-asent azekka ncallah a d-yaweḍ baba-tkent a d-yawi lxiṛ amxalef, a nefreḥ meṛṛa, dγa ṭṭsent. Tenṭeq temγart:-Nekk a mmi welleh ma qqneγ tiṭ-iw kra ikka yiḍ, qarreγ-as kan immut tečča-t tizi neγ ičča-t yifis neγ nγan-t yimcumen.
Yuγal inṭeq urgaz weḥd-s kan:-Ad isufeγ Ṛebbi γer ddεawi n tmeṭṭut-iw kan.
Yahia Yanes