Letnayen yezrin, lwali n Bgayet, Mass Ali Bedrisi, yerza ɣer At Ɛidel tama Umalu. D tirza n uxeddim d usefqed ɣef yisenfaren yebdan yakan d wanda wwḍen lecɣalat deg-sen. Deg ubrid n tirza, yeḥbes ɣer yiwet n luḍa i d-yezgan ɣef tilist n tɣiwant n Umalu akked Sedduk, tin iwumi qqaren Iɣzer-Lekrim, acku d yiwen n umkan ideg tezmer ad d-ttwixeleq akka ɣer zdat yiwet n temdint tajḍit. Amkan-a d luḍa rnu ad tt-id-yedhem akka ɣer zdat ubrid ameqqran ara yeqqnen gar Bgayet d l’autoroute. Daɣen, abrid n tmacint ur yebεid ara aṭas fell-as. Deg-s azal n 280 yegtaren, tezmer ad ttwixedmen deg-s aṭas yisenfaren (sbiṭar, tasnawit akked tmezduɣin).
Syin yessefqed lwali d wid i d-yeddan yid-s adeg n Geldaman iwakken ad d-iwali anda wwḍen lecɣalat n ugudren n ubrid yettawin ar Tmuqqra. Deg umkan, yemmeslay d yimḍebbren n tɣiwant-a ɣef wameki i yezmer ad d-yili usefti n tedrimt deg udrar n Geldaman s uxlaq n les carrieres n rrmel d ugrabyi.
Syin akkin, iqerreb ɣer uxxam n tɣiwant n Umalu, anda i yemlal d yimḍebbren-ines akked imezdaɣ. Aselway n tɣiwant yemmeslay-d anda wwḍen lecɣal, tettunefk daɣen tegnit i yimezdaɣ ad d-fken ula d nutni awal-nsen ɣef yiɣeblan-nsen, ɣef wayen akk i ten-iceɣben.
B. Benhamouche