Ass agraɣlan n uselmad i d-yettasen yal 5 deg waggur n tuber mmugren-t yiselmaden n Tubiret s uɣunzu n uɣerbaz iwakken ad d-beggnen lɣid-nsen zdat liḥala ideg ttidiren. Tasebḥit n wass, tanmehla n usegmi n twilayt tenna-d yakan ḥala azal n 12% i iḥebsen ɣef lxedma. Maca, lewhi n uzgen n wass, wid yettmeslayen s yisem n yiselmaden n tesnawit CNAPEST di Tubiret, ffɣen-d s yiwen n wulɣu anda i d-fkan ttfasil ɣef uḥbas n lxedma deg uswir-agi. Γef leḥsab n wayen i d-nnan, tisnawiyin akk n twilayt rrant-d i teɣri n ssandika, d acu kan mgaradent deg wazal n wid ur neḥbis ɣef lxedma. Uddren-d yakan aṭas n tesnawiyin i yeddan deg wawal n CNAPEST, am waken i d-nnan ɣef tid yekkukran. Deg wulɣu-agi, ad naf iselmaden-a suturen kra n yizerfan am twafɣa mbeɛd 25 yiseggasen n lxedma, asnerni di tjarnanin n yiselmaden, asedduy n yiɣerbazen ilmend n tmusniwin tigraɣlanin d tikci n wazal i yimassanen. Am wakken daɣ i rran ddehn-nsen ɣer kra srabes yerzan “les oeuvres sociales” d yimḍebbren deg unnar n usegmi anda i suturen deg unemhal n Tubiret akken ad yessizdeg liḥala di tenmehla s ubeddel n kra yimḍebbren i tḥuza tedyant n unebdu iɛeddan anda axxam n ccreɛ yessawel i waṭas seg wigi ɣef useddu n kra tlufa s yir udem. Di taggara, wid yettmeslayen s yisem n yiselmaden n tesnawit beggnen-d lferḥ-nsen deg umḥan n utekki deg uḥbas n lxedma deg wass yecban ass-a.
M. Smail