Ufan tafekka-s deg ubrid yettawin seg Sid-Ɛic ɣer Udekkar, deg umkan iwmi qqaren Ḥemmam-Silan. Ɛlaḥsab n wayen i nesla, nɣan-t assen yakan mi t-xeṭṭfen. Ḥed ur yeẓri anwi-ten widak-a. Ssebba n waya ɣef wayen i d-nnan, d tukerḍa n tqeḍɛit n yizamaren, dɣa yettnadi fell-as deg leǧwayeh-nni almi kan i as-d-sawlen ɣer tilifun-is, fkan lweɛd ɣer umkan anda ara yaf lmal-is. Nniya nniya, abrid yessaweḍ-it ɣer umkan anda i yeǧǧa tarwiḥt-is. Ṭumubil, ufan deg-s timeqwa n yidammen, ma d tafekka-s, ufan-tt deg umkan-nniḍen deg yir liḥala. 4 wussan uqbel, lɛesker, ijadarmiyen ur ǧǧin amḍiq, ttnadin fell-as. Ula d lmir n tɣiwant n Tinebdar yessawel i tesquma n tudrin akken ad nadin ula d imezdaɣ fell-as. Dɣa, At Tnebdar akk ttḥewwisen deg lexlawi i d-yezzin i tuddar, ur t-ufin. Ɛ. S., yettwanɣa, yeǧǧa-d deffir-s tameṭṭut s tlata n teqcicin yeɣɣaren deg tesdawit. Ad d-nerr lbal, i tikelt tamezwarut i d-yella uxḍaf deg twilayt n Bgayet, yerna ur sutren ara lfedya. D ayen i yeswehmen aṭas yimezdaɣ n temnaḍt-a.
D. I.