Taggara n tikli tella-d di tenmehla n usegmi n Tizi Wezzu. « D tikelt tamezwarut anda d tinelmadin i yeṭṭfen imekwan imezwura di tikli, ahat ad d-nawi kra », i d-yenna Ṭariq.
Djamila Ahitaghel
Ass n lexmis iεeddan, inelmaden akk n tesnawiyin n temdint n Tizi Wezzu ffɣen-d s abrid iwakken ad d-sbanen reffu-nsen ɣef wayen i d-yusan d ajdid aseggas-a. D acu i ten-yessawḍen ad d-fɣen ass n lexmis mačči uqbel ? Tazwara tebda-d si tesnawit Lxensa ; da, rran-d inelmaden ur nelsi ara tabanda (tablier). D aya i yeğğan inelmaden-nniḍen n tesnawit-a ad ilin ɣer tama yimdukal-nsen ; awal yettawi yettarra gar yinelmaden armi d-ufan iman-nsen akk di berra. Syin tebda tikli ɣer tesnawit n Ɛmiruc, ineggura-a ttnadin kan sebba swayes ara d-beggnen lɣiḍ-nsen ula d nutni ; rnan-d ɣur-s u yebda yettimɣur ugraw armi i d-zzin akk i tesnawiyin n temdint n Tizi Wezzu. Gar wayen suturen yinelmaden-a, εlaḥsab B. L. akked M. A. : « Ur nebɣi ara ad nels aṭabelyi, bezzaf i neqqar deg yiwen n wass : nteffeɣ-d deg uxxam i ṭṭlam, nettuɣal i ṭṭlam, melmi ara nesteεfu, melmi ara nɣer. Rnu yir lmakla di lakuntin ». Inelmaden-a mi leḥḥun εelqen iṭabelyin-nni nsen deg yiqeccuḍen, ttiẓẓifen : “anwi wigi ? D imaziɣen.” Mebla ma nettu diɣ kra n wawalen i d-qqaren ɣef uneɣlaf n usegmi, Benbuzid.