Yal mi ara d-isuḍ waḍu n tefranin, ad yekker wahruḥu deg yimdanen, ad yeḥmu ṭṭbel, ad ketren iceṭṭaḥen. Isertiyen ad ttmeslayen, ad ttreggimen i lɣaci ad d-nexdem aya, ad nili akka, ad d-sewwen lexrif di ccetwa. Wiyaḍ,; ad rzun ɣer texzant-nni n teɛrucit, ad d-jebden tagmat-nni ur nenfiε. Ineggura, taseffit i d-teǧǧa Fransa ara d-isewqen. Lḥasun, win ifaqen, yuɣ lḥal qqsen-t yizerman ad yettnezzih, yaɣ-itt mkemda, acku ma yenna-d kra ad yettwaεzel. Mi tefra tmeɣra, nnejmaεen yemdanen, ad d-teḍher tidet qerriḥen. Yekfa nniɣ-ak tenniḍ-iyi ! yerna ula d tarewla ula sani.
Yal tikelt ad nsel ffɣen-d yemdanen, medlen tiwwura n tɣiwant, imi ulac aman, lgaz, iberdan… Anda-nniḍen, ssuturen tanezduɣt, ttεeggiḍen ɣef maḥyaf d temḥeqranit.
Si tama-nsen, lemyur qqaren d akken ddewla ur d-tefki kra, ur nezmir d acu ara nexdem. I wayen akk i s-tzuxxem ? Si tama-nniḍen, d yiwen n lehlak ameqqran i yuɣen tiɣiwanin nneɣ. « Le blocage ». yuɣal d « La mode ». Acḥal d taɣiwant ar ass-a ur tufi iman-is, imi iεeggalen n usqamu ur msefhamen ara, wa ijebbed wa ikerref. Imedyaten ggten, iɣeblan ṭṭuqten, d imdanen kan i tent-yuɣen. Γef lǧal n ukersi, wid i d-yufraren di tfernin ttun akk widen akken yeddan fell-asen, ttun yella ugdud, yal wa yettmuqul amek ara yili d netta i d lḥakem.
“A win ɣef yeshel walluy, ḥader iman-ik di trusi”, i s-yenna ccix Muḥend.
M. Smail