Ass-nni n larebɛa, iṭaksiyen n Uqbu rran-d i tiɣri n sandika-nsen i d-yessawlen ɣer uḥebbus ɣef yixeddim. Sseba d tukksa n umkan n uḥbas n yiṭaksiyen yellan di Genduza. “Seg d 11 di wenber 1996 d nekni dagi i nḥebbes, ass-a nufa-d iman-nneɣ berra i la station”, i aɣ-d-yenna yiwen n umenhar n uṭaksi.
Ugur-agi yebda-d segmi akken kan i bdan lecɣal n tqenṭert tamaynut n Genduza i d-yezgan ɣef ubrid aɣelnaw wis 26. Xerbent tlisa asmi d-kkren kra yimezdaɣ zeḍmen-d ɣef umkan-nni ideg ḥebbsen yiṭaksiyen. Imezdaɣ-a qqaren d ayla-nneɣ umkan-agi, seg yimir ufan-d yimenharen n yiṭaksiyen iman-nsen ulac anda ara ḥebsen.
Xas akken teḥres ɣef yimenharen-agi, maca sebren, zewwren leεqel, bdan cckawi s ubrid n talwit. Uzzlen ar tɣiwant d la dayra n Uqbu iwakken ad d-afen tifrat : “deg wussan-nni imenza n ɣuct, nemlal di tɣiwant nekni d imḍebbren, nehder yid-sen s tin n lxir iwakken ad aɣ-d-afen tifrat yerna ḥeḍren gar-neɣ srabes n laman d les service technique n l’urbanisme n Uqbu, reggmen-aɣ s tifin n umkan iwulmen iwakken ad nḥebbes. Nnan-aɣ-d di 4 wussan ad d-naf tifrat. Maca tura newweḍ ɣer 4 waguren, wissen ar melmi ara d-tili tifrat ?”, i aɣ-d-yenna Mass Megdud Lḥasen d aɛeggal, yeḥḍer deg unejmuɛ i d-yellan deg uxxam n tɣiwant.
Tifrat ur d-tban ara deg yimeslayen i asen-d-yerra yiwen n yimḍebber n tɣiwant n Uqbu i d-yerzan s amkan ideg d-nnejmaεen yimenharen, tameddit n wass iṭaksiyen n Uqbu i ixeddmen gar lwilayat gezmen-tt di rray ur ttuɣalen ara s ixeddim, ammennuɣ ad ikemmel alma yefra wugur-agi. “Tikelt-a tewweḍ-d ɣer uɣrum-nneɣ d win n warraw-nneɣ,; d lmuḥal ad nessusem”, i d-yenna yiwen n umenhar.
Ma d imḍebbren n tɣiwant am leεwayed-nsen kan, ur d-lhin ara s taluft, ahat ɣur-sen yella wayen yezwaren aya neɣ alma teḍra-d kra n lexsara ara d-kkren..
B. Ben.