Tamedyazt yellis n udrar daddam s tumert
Yenna-yam ayyuz izlan ur tumi tifert
Berrk a lal isefra berrk ɣer igger teggert
Aǧeǧǧig amalal yefsa s zur n tuddert
Farid Zelhud illul deg useggas 1959 deg taddart n Adday di Tafrawet deg Lmerruk. Yesselmed tutlayt tafransist, u yella d anaẓur deg waṭas wudamen am tira, tiflewt akked d nqec ɣef usɣar.
Farid yettleqim awal n tmaziɣt s lmun yettawi-d isefra i d-yekkan seg udrar n waṭlas, akked d tehri n Rrif. Imeslayen-is wwin-d si telqay n tmuzɣa, ugmen-d si leḥnana n tayri:
Asekref idus mladd-is uffiɣ afessay
Ur yakk idrus w akud ad nder tisiwaɣ
Iziker d uzal tassat d ida n ugellay
Ur rad ten bdereɣ anwa ur yak ittaɣ
Aṭas n warrazen i d-isaḥen i Farid, arrazen-agi d inigan ɣef cbaḥa n tmedyazt-is akked d telqay n tira-ines. Ger warrazen-agi yella : arraz n “Saεid Sifew” di 1977, arraz n “imesnulfuyen imeẓẓyanen” deg tfaska taɣelnawt “Abed el karim Xatabi” di 2000, akked d arraz “amynut” di 2001. Maεlum ad yili wanecta imi awalen n Farid turaqqmen s sser akked d thuski.
Tazwit n umwan ajeggid-ines ur ten yanni yan
Maca nekki zerreɣt ɣer ida llin akk anatam
Ur ad anneli ad as anniɣ izri gan-aɣ anatam
Tamment n uslal d ttin imal tafsut n kuyan
Aṭas n yidlisen i yurra Farid am tamezgunt n isefra : “imaruyen, takad, iɣd” ( etincelle, feu, cendre) sɣur tiẓrigin “berbère” di Fransa. Am wakken diɣ i d-yessufeɣ aṭas yedlisen s tefransist amedya : “Parole de Paria” ɣer tiẓrigin Les Cahiers d’Anoual.
Ubbic n udfel asgad aksum a timiwin
Nwanim ɣef inkan yega uruku tikinin
Ur wallaɣ anwal awal asafer n yan
Yeggan afgan yečča deg-s sul fekkin i yan
Farid yettiki deg waṭas n temliyin akked tcemliyin yezdin tira s tmaziɣt am tḥawect n tenfusin timaziɣin n rrif i d-yeffɣen deg useggas n 2007.
Farid yesεa tira deg yidammen tamaziɣt deg wul, tettunfk-as ad d-yessefru, yessefra yenna :
Mami nniɣ-ak, ur nezlem ma felli yallan
Is ur yuff ifessi ugiɣ ma felli yallan
Azarug abrid neduft awett-as leqmeɣ
Aman iɣer-iten wwiɣ,; yewwi wul-iw inwi-s rekmeɣ
Ait Slimane Hamid