Yal aseggas tettezzi-d tegnit akken ad d-nemeslay ɣef tegrawla n 54, maca asentel-agi ur itezzi ara aṭas di tira n tamaziɣt (ungal), dɣa d aya i d a-ɣ-yewwin ad d-nemmesly ɣef temsalt-a deg yiwen n ungal i d-yettwasizergen di 2003 sɣur umyaru Ɛumer Daḥmun. Tira n Ɛumer Daḥmun deg ungal-agi tewwi-d ɣef aṭas temsal tid yeḍran di yiwet n taddart iwmi qqaren At Mger-d-uzzal, dɣa tettmeslay-d ɣef tudert n yizzayriyen deg yiseggasen n 1940 alma d 1954, si tama-nniḍen yesbedd umyaru ungal-is ɣef tlata n yemdukal ; ameqqran deg-sen d win iwmi qqaren Amɣar, alemmas deg-sen d Bu tqulhatin, ma d ameẓẓyan maḍi d win iwmi ssawalen Čaqlala. Ma d ayen yerzan amek i lḥant temsal deg wungal, dɣa tebda teqsiṭ s yemdukal yettruḥun si taddart ɣer tayeḍ. Dɣa iruḥ Bu tqulhatin ɣer Micli, syin akkin, ruḥen di tlata yid-sen ɣer taddart Lemqam, uɣalen-d ɣer taddart At Taɣert-Uqerruy, syin, rran-d ɣer At Wumriɣ,; ɣer taggara uɣalen-d ɣer taddart-nsen. Dinna yezzi umyaru ɣer tayri n umɣar, maca ɣer taggara taqcict yewwi-tt Bu diminu…, amur anegaru n ungal yemmeslay-d amek yekcem Bu tqulhatin d yemdukal-is ɣer tegrawla. Anekcum-agi n Bu tqulhatin d yemdukal-is ɣer tegrawla n 54 ur d-yelli ara kan akka. Yenna umyaru deg usebter 91 asmi i d-yettmeslay ɣef tudert n Umɣar d Čaqlala di tmaneɣt, am yixeddamen yizzayriyen, nutni daɣen xeddmen ɣer yiṛumyen sganayen-ten deg texxamin i d-yezgan zdat udaynin. Deg usebter 99, yemmeslay-d ɣef wamek i yenɣa Bu tqulhatin mmi-s n lqayed, dɣa tagnit-nni temmal-d d acu yeswa uzzayri imiren : amek akken i d-yufa Bu tqulhatin mmi-s n lqayed yessikir di lqaεa yelli-s tawḥidt n yiwet n temɣart acku yebɣa ad tt-yawwi d taqeddact s axxam-is, ɣas akken nettat tugi, dagi tiruggza n Bu tqulhatin tedla ɣef uεbar, tekkes mmi-s n lqayed si tudert. Tilufa akk mlalent-d ɣef Bu tqulhatin, maca mlalent-d di tidet akk ɣef yizzayriyen, d ayen i yeğğan amyaru yemmeslay-d ɣef taddart merra asmi i yenna : “Taddart At Mger-d-uzzal tettidir di lḥif d ẓẓelt i yettnernin deg wass ɣer wayed, ccer, tiεeryent, leɣrama si kul lğiha tjebed deg-sen. Lqayed d lḥakem zgan d tagalit di lɣaci…”. Mačči ala waya iɣef d-yemmeslay ungal-agi, yewwi-d daɣen ɣef tukksa leqder d tferkiwin d wayen-nniḍen, d ayen akk i yeğğan Bu tqulhatin yerfed tamegḥelt-is, yenɣa lqayed d mmis akked lḥakem. Seg wass-nni, ur d as-d-tegri tudert di taddart, ilaq kan ad yali s adrar, dɣa d ayen yexdem, yedda yid-s Čaqlala. Γer taggara, nezmer ad d-nini d akken yefka-aɣ-d wungal-agi s wuden lqayen amek tella tudert di tallit-nni (ɣas akken win i t-yuran ur yeddir deg tallit-nni) yerna ileddi allen ɣef kra n txidas n umnekcam arumi d wid yeddan yid-s. Daɣen, ibeggen-aɣ-d amek yella ugdud azzayri qbel ad tekker tegrawla, tin ideg ɣlin aṭas n yimeɣrasen… Dɣa, ilmend n tsawent si d-kkan, ad asen-nerr tajemilt tameqqrant akk i yimeɣrasen yeɣlin ɣef tmurt-agi. Ferhat Baluli
Aselway n tdukla usemmil n udlis
www.adlis.jimdo.com