Ass-nni, n sebt yezrin tidukla “Ixulaf” thegga-d yiwet n temlilit n useεlem i uqabel n yinebran yettzidin di tmurt-nneɣ seg useggas ɣer wayeḍ. Aya igellu-d s tigujla n dderya. Timlilit-agi, ḥedren-tt ṭṭeba n tnefsit, imusnawen n tussna n tmetti d wid n lqanun akked ccreɛ,; iεeggalen n twaculin iruḥen d asfel s sseba n yinebran n lwaldin-nsen. Deg temlilit-agi, imusnawen n uḥric n ccreε mmeslayen-d ɣef lqanun n tmurt n Lezzayer ur nefki ara azref i tarwa iwakken ad d-fken rray-nsen, ɣef uzekka-nsen mbeεd mi ara d-yili faruq gar yimawlan-nsen. Syin akkin, yella-d wawal ɣef leqdic txeddem tdukla-agi iwakken ad tεiwen igujilen-agi s walallen tesεa, ladɣa wid yeqqaren deg yiɣerbazen. Am akken daɣen teεreḍ amek ara d-taf tifrat gar kra twaculin qbel ad awḍen ɣer uxxam n ccreε. « Nεerreḍ akka s wayen nezmer amek ara d-nerr taḍsa d uzmumeg ɣer wudmawen n yigujilen-agi, iwakken ur ttaran ara iman-nsen di ṭṭerf », i aɣ-d-yenna Mass Ǧarraḥ Zaydi s yisem-is d aselway n tdukla “Ixulaf”.
Am akken, yezzi wawal ɣer wamek i ilaq ad ttqabalen yiselmaden liḥala n tnefsit n ytinelmaden deg tneɣrit, ladɣa wid iwumi mmfaraqen yimawlan-nsen s sebba n yinebran. « Tenna-iyi-d yiwet n tnelmadt-iw : amek tenwiḍ ad ɣreɣ,; ad ruḥeɣ ad εiwneɣ yemma deg yimeṭṭawen-is », i d-tenna yiwet n tselmadet n tesnawit.
S umata, di temlilit-agi yuzzel wawal ɣef wamek ara tili tifin n tifrat i wugur-agi yettzidin s waṭas di tmurt-nneɣ qbel tiwḍin-is ɣer uxxam n ccreε. Γer taggara, wid iḥeḍren ufan-d belli aseḥyu n tejmuεa-nni n tudrin n Leqbayel yesεa azal meqqren. Imi zik-nni, asmi ferrunt tila di taddart, segmi uggten wid yettlawin lxir gar twaculin d yiεeggalen-nsent, « asmi tella tejmaεt ɣef ifadden-is ur ttawḍent ara tlufa s ixxamen n ccreε », i d-yenna yiwen n umɣar i iḥeḍren di temlilit-agi.
B. Benhamouche