Aɣerbaz n yimeεdar n Buzgan (centre psychopédagogique de Bouzeguène), i d-yezgan deg At Sidi-Ɛemmar, necden-d ddurt-ni yezrin mass Thierry Martinez, anemhal n uɣerbaz yettexessen i warrac imecṭaḥ akk d yimeqqranen, di temnaḍt n Besançon (Obnans), tamdint n Doubs tamurt n Fransa.
Deg tirza-s, yemlal u yemmeslay aṭas d Mass Said Hamoum, aselway n tdukla n yimeεdar d yemdukal-nsen n Buzgan akked yiεegalen n tesqamut.
Ass n sebt yezrin, yemlal akked yimḍebbren n uɣerbaz, rnu iselwayen n tɣiwanin n Buzgan, Ijer, rnuɣur-sen imḍebber n ugerzu n Tizi-Wezzu akked yimḍebber n usqamu aɣelnaw, anda mass Thierry Martinez yesḥasef aṭas s wuguren i d-ttafen yimeεdar. Yessuter Mass Thierry Martinez deg yimḍebbren-agi akken ad d-fken afus n lemεawna. Dɣa yefka-d yiwen wahil yelhan i uselḥu n uɣerbaz-agi n yimeεdar, ad yeddu deg ubrid n unegmu d tneflit iwakken ad d-rren asirem d wafud i yimeεdar, rnu ad-kemmlen almud-nsen deg yiɣerbazen. Γer tagara n temlilit, Mass Thierry Martinez yewked-d d akken ad d-yuɣal ɣer Buzgan, tirza-nniḍen yesarem ad yaf tgerrez tegnit.
Islam Bessaci