Ddqiqa kkan Ssuq-Lḥed temmeɣ si lɣaci i d-yenneɣlan si yal tama. Tuddar yakk myefkant ttiεad din. Simi yebda tamlilit D.J. wer yensi. Tabraḥt yellan ddaw n uxxam n tɣiwant teččur d yemdanen akken ad wallin timlilit lwaḥid s ttawli n datashow. Yuɣ lḥal tasebḥit-nni n wass n larebεa, ilmeẓyen ttgallan : “yiḍ-agi ad tt-nerwi”. Yiwen seg-sen ur t-yekcim ccek belli rwaḥ ɣer lmundiyal n 2010 deg Tefriqt n wadda, ad yuɣal i terbaεt-nneɣ taɣelnawt n Lezzayer. Ala rrbeḥ ara nerbeḥ i ttsuɣun s yiwet n taɣect. Deg wakken i tt-ḥman, ula d yimɣaren ddan di zeḍwa, s tjewaqqin n tkeryas-nsen akken ad asen-rnun afud. Temlal tasa d way turew !
Lferḥ iεumm deg wulawen n yal yiwen. Deg wakken yenfel lferḥ imi yendeh unefray d taggara n temlilit, am yiwen n urgaz i merra wwin abrid ɣer Tizi-Wezzu. D imeyyaten n tkuryas d yifurgunen i yemsetbaεen wwin abrid akessar. Tizi tebha s warraw i d-yemmaren ɣer yirebbi-s !
Aḥiḥa yesdelwiḥ,; tiɣratin n tullas smendigent, tagmatt tga ifadden, dɣa kra yellan din yennekmal. Tameɣra yebdan, tugi ad tawi, arrac ttazalen di yal tama, asenjaq n Lezzayer deg ufus. Terwi akken ilaq !
Ticki d lferḥ i yessazzalen arrac-nneɣ awi-d akka ad tdum i d-yenna s ucmumeḥ yiwen n umɣar, imeṭṭi deg wallen-is. D tidet agdud-nneɣ yuklal ad yefreḥ,; tanemirt i yemyurar n terbaεt taɣelnawt i d asen-t-id-yewwin !
Ait Slimane Hamid