Lḥemla n tsemhuyt n ucraḍ aseggas-a i yigerdadan d imuḍan yeṭṭef waṭan ssker, temgarad s waṭas ɣef tin n yiseggasen iεeddan. Aseggas-a, mlalen-d akk yimuḍan n tɣiwanin i d-yezzin i Uqbu am Tazmalt, Iɣil-Aɛli, Aqbu, Iɣrem, Icellaḍen, Tamuqra, Awzellagen ; iwakken ad cerḍen di sbiṭar n Uqbu. D imeyyaten n yimuḍan i d-yettasen yal ass, tuget deg-sen beɛden. Dɣa yeqwa usegger d umdegger gar-asen anwa ara ay εeddin d amenzu. Llan wid i d-yettbekiren ɣef 4 ssbeḥ iwakken ad jerden iman-nsen bac ad ten-id-tsaḥ ddala. « Iseggasen yezrin yal yiwen yecreḍ di liyamji d yifermasyanen i t-iqerben, ulac akk anect-a n ddḥis », i aɣ-d-yenna yiwen n umuḍin i nesteqsa. Ma d imḍebbren n sbiṭar i nesteqsa, nnan-d nekni ur nuksan ara. « Mačči sɣur-neɣ i d-yekka lamer-agi. Aseggas-a, lḥemla n ucraḍ di CHU d EHP am wakken i d-tettili di tamiwin-nniḍen n tmurt, lamer-agi d aɣlif n tezmert i t-id-yefkan, nekni ad nexdem akken i aɣ-d-nnan, wa ad nesseḥres akken ddwa-yagi ur tettwakar ara, ad taweḍ ɣer yimuḍan baṭel war lexlas d aya i nezmer ad nexdem… », i aɣ-d-yenna Mass Abbasen d anemhal n sbiṭar n Uqbu.
B. Benhamouche