D iselmaden n uɣerbaz amenzu Ḥikam Ḥusin n taddert Sennana deg tɣiwant n Ddreɛ-Lmizan, nutni d yimawlan n yinelmaden i igezmen rray n uɣlaq n uɣerbaz-agi skud ur telli ara tifrat n yiɣeblan-nsen. Ayen ssuturen d asufeɣ n yimezdaɣ berra n lqanun deg tnezduɣin d tzeqqa n leqraya n uɣerbaz-agi d usčču-ines seg useggas n 2005. Ad nesmekti belli iselmaden n uɣerbaz-agi, llan xedmen yiwen n wass n uḥbas i leqraya i yal ddurt ilmend n yir taswiεt ideg ttidiren yinelmaden ; rray i ddmen deffir unejmuɛ- nsen ass 19 tuber yezrin. Tawriqt n unejmuε-agi ideg stenyan 12 yiselmaden d tin ceggɛen i uqerruy n tɣiwant, anemhal n leqraya, aqerruy n dayra, anemhal n uɣerbaz- nsen, d sandika UGTA d lwali n twilayt n Tizi-Wezzu. S wakka yella-d rray n uɣlaq n tewwura n uɣerbaz seg ddurt yezrin.
I usmekti, rray n uḥbas n leqraya yusa-d seld tabrat i iceggεen yimawlan n yinelmaden ass n 19 yezrin anida ssuturen tifrat n uɣbel-nsen. Maca, ar ass-a ulac tiririt seg yimḍebbren. S wakka iselmaden ssuturen ayen inefεen inelmaden yenḥafen. Inelmaden n uɣerbaz-agi, ur zmiren ara ad d-sfaydin s tuččit deg lkantina n uɣerbaz-nsen imi anemhal n uɣerbaz yezdeɣ deg-s netta d twacult-is. Imḍebbren n tɣiwant ur nufi ara tifrat i uɣbel-agi, ala abrid n ccreε iwakken ad d-uɣalen i warrac izerfan-nsen.
Dalila I